Ich Ott Schech Hern Marchartz sun tvn chunt vnd vergich an disem prif allen, di in sehent, lesent oder horent, mit sampt allen minen erben, Daz ich mit verdachtem mvt vnd mit gutlichem willen aller miner erben Dem Gotshavs hintz Gersten han geben durch miner sel vnd miner baider hausvrowen alhaiten vnd annen vnd aller vnser vodern sel willen vnd hail auf sant Cholmans alter zwai Gůt, ains in Sirnicher pharr haizzet an der stelzhub vnd dient nv^er ein phunt phenning zwir in Jar an sant Nyclas tag vnd an sant Goren vnd zwai hvner vnd vier vnd zwainzich phenninge ze anlait ab vnd auf. Daz ander gut leit in Ternperger pharr am raday vnd haizzet an Ekke vnd dient achzich phenninge an sant Michels tag vnd zwai hvner vnd ze anlait ab vnd auf zwainzich phenning, vnd han ich abgenomen vnd geleit di stevr auf den zwain gůten durch miner vnd aller miner vodern sel willen, vnd van dem dinst der zwair Gůt sullen alle wochen auf sant Cholmans alter zwo mess gesprochen werden vnd van der mess drey phenning, des eritages van dem hailigen gaist vnd des Samptztages van vnser vrowen ze hilf vnd ze trost miner vnd miner baid hausvrowen vnd aller miner vodern seln. Vnd swo man dar an savmich wer, so suln sich min nest erben der vorgenanten gut vnder winden vnd inne haben so lang, daz di mess wern ervollet, di da versavmpt sint. Daz di sach stete vnd vnzerbrochen beleib van mir vnd van allen minen erben, gib ich disen Prif versigelt mit minem insigel vnd mit Hern Marchartes insigel des Prevhafens zv einem ewigen vrchvnde. Vnd ist der Prif gegeben, da ergangen warn nach christes geburde drevzehen hundert Jar vnd vier vnd zwainzich Jar an sant Gorgen tag.

Source Fulltext: OÖUB 5 (Wien 1868) S. 389-390, Nr. 392