Wir drey bruder Perchtolt, Peter vnd Stephan ponhalm vergehen vnd offen an disem briet allen den, die in lesent, sehent oder horent, di nv lebent vnd nach sint chvmftig, Daz vnser vater wulfinch, dem Got gnade, hat gegeben Hintz Gersten den Herren in die oblay ein hub, leit in Sirnicher pharr vnd haizzet auf der Haid durch seiner sel vnd aller seiner vodern sel Hayl mit vnserm vnd aller vnser erben gutlichem willen vnd hat die gegeben mit allem dinst vnd reht, als er sei gehabt hat, an als vil, daz man da van dienen sol fur grozzes dinst vnd fur stewr sehs schilling phenning wienner mvnz an Sant Gorgen tag vnd sol man da van seinen Jartag begen mit vigili, mit mess vnd mit andern Gotlichen dingen alle Jar, swen er ist. Wer aber daz, des wir got niht entrawen, daz di Herren van Gersten dar an savmich wern vnd den Jartag niht begiegen (sic), so suln wir oder di nest vrevnt di vorgenanten Hub so lang inne haben, daz die Herren wider tvn, daz da versaumpt ist gewesen. Daz di sach vnd daz gescheft stete vnd vnzerbrochen van vns vnd van vnsern erben beleib, geb wir disen brief ze einem ewigen vrchvnde versigelt mit vnser baider Insigel Perchtoltz vnd Petreins vnd sint des zevge Her Ott schech Purchrof ze Steyr, Her Marchart vnd Her Ott Prevhefer, Heinrich von weinzurl, Heinrich Ponhalm, vlrich Otzstorfer, ott Hurnberch, Fridrich steger, Ott van Pless vnd ander erber leut. Vnd ist daz geschehen, da van christes geburde ergangen warn dreuzehen Hundert Jar vnd dar nach in dem eht vnd zwainzegisten Jar an sant Potencian tag.

Source Fulltext: OÖUB 5 (Wien 1868) S. 517-518, Nr. 516