Jch Heinreich von Rizmerstorf vergih mit disem offem briefe vnd tu^eu chunt allen den, di disen brief sehent, ho^erent oder lesent, die nv sint vnd noh chunftich sint, Daz ich mit woluerdahtem mu^ete vnd ze den Zeiten, do ich ez wo! getu^en moht, mit miner Hausfrowen Diemu^eten vnd aller miner erben hant, gunst vnd guten willen dem erberm manne Pilgrimen dem Gestner purger ze judenburch, Perchten siner Hausfrowen vnd allen ieren erben meins rehten aigens verchauft vnd aufgebn han Ein gût ze veustritz gelegen bei sand Marein diennt ein march geltz, da Gotschel der angrer auf sitzt, mit alle dev vnd dar zv^e geho^ert, gesu^echt vnd vngesu^echt, gebowen vnd vngebowen vnd mit allen dem rehte, als ichs vnd mein vorderen in nutz vnd in gewer her han bracht, vmb Nevnnthalbe March silber gewegens wienner gewichtes mit Leichauf mit all, der ich gar gewert bin, vnd sol ich vnd mein Hausfrow dev vorgenant vnd all mein erben dem vorgenanten Pilgreim, seiner Hausfrowen vnd allen sein erben Daz vorgenante gut vnd allez, daz dar zv^e geho^ert, getreulichen scherm vor aller ansprach nah aygens reht vnd als daz Lant Steyr mit alter gewonhait her hat bracht. T°un wier des niht, Swelhen schaden des di vorgenanten leut nement, den si bey ier selbs trewen mugen gesagen an all ander bewerung, den sulen wir in abtun an alle chlag vnd taidinch vnd sulen den haben auf vns vnd auf alle dev vnd wier haben. Daz daz stêt belibe vnd vnzebrochen, gib ich in disen brif ze einem offen vrchund vnd ze gezeuge der warhait versigelt mit minem hangundem jnsigel vnd sint des gezeuch Gerunch der Scheufliger, Nykla von Ritzmerstorf, Ditmar der Ledrer, jacob sein geswey, Gerunch von watzendorf, Eberl sein aydem, Heinrich der Lantfraz, Ott der zehner von Mos vnd ander erber leut mer. Der brif ist gebn ze judenburch vnd ist geschehen, do man zalt von Christes gepu^ert Tausent jar, Dreuhundert jar vnd dar nach in dem Dreizzigistem jare an des Heiligen Chreutzes tag in dem Herbst, als ez geho^eht wart.

Source Fulltext: OÖUB 5 (Wien 1868) S. 586-587, Nr. 585