Ich Ditrich van volchenstorf vnd min Hausvrow vre Kathrei vnd alle vnser erben veriehen vnd offen an disem brief allen den, di in lesent, sehent oder Horent, di nv lebent vnd nach werdent chvmftig, Daz ich mit wol verdachtem mv^et vnd mit miner vrevnt rat vnd mit allen vnsern erben gu^etlichem willen dem Gotshaus hintz Gersten han geben di aigenschaft an der Hu^eb, die gelegen ist ze Piricharn in dem winchel, di vlrich der Chaufman vnd sein aidem Ditrich Hiltprantz svn van mir gehabt habent, vnd pin ich des Gotshaus ze Gersten gewer mit allen minen erben der vorgenanten Hu^eb fur alle ansprach, vnd ob daz geschech, daz vnser erben oder ander iemen dar nach chriget, den selben chrige sol ich vnd vnser erben dem vorgenantem Gotshaus auz bringen vnd swelicherlay schaden das Gots, haus ze Gersten dar an nem, den sol iz haben auf alle dev vnd ich vnd vnser erben in dem lant haben. Daz di rede also stete vnd vnzerbrochen dem Gotshaus van Gersten van mir vnd van vnsern erben beleib, gib ich disen brief ze einem warn vrchvnde versigelt mit minem Insigil vnd mit Hern Otten des Schechen Insigel vnd sint des zevge Her vlrich van Gruenburch, Her Ditmar van lobenstayn, Her Marchart vnd Her Ott prevhefen, Ott Hurnbech, Chunrat van Pless, Heinrich enser vnd ander erber leut vnd ist daz geschehen, da van christes geburde ergangen warn drevzehen hundert Jar vnd dar nach in dem dreizkisten Jar an sant Gregoren tag.

Source Fulltext: OÖUB 5 (Wien 1868) S. 577, Nr. 576