JCH Arnolt der Hinterpurger ze wachowe vnd mein Hausfrowe Geisel vnd vnser Erben vergehen an diesem Prief vnd tu^en chunt allen den, die in ansehent oder horent lesen, die nv sind oder chumftig werdent, Daz wier mit wolbedachten mv^et vnd da wier ez wol getu^en mo^echten, vnsern weingarten ze Ringleinstal, do man von dient Drey pfenning ze Purchrecht vnserm Herren von Chv^enring vnd funftzehen pfenning ze wochowe auf daz Gotshaus, mit allen dev, vnd derzv^e gehort versu^echt vnd vnuersu^echt, wie daz genant ist, verchauft haben recht vnd redleich dem Erbern manne Duringen dem Lertz Purger ze Steyr, vron Kathreinn seiner hausfrov vnd ir paider Erben vnd sein auch des selben Gu^ets, vmb we wir in verchauft haben, von in gantz vnd gar verricht vnd gewert. Wier haben in den vorgenanten weingarten aufgeben mit Perchmaisters hant Ru^edolfs des wolferoewter zten zeiten Richter ze wochhowe mit aller vnser Erben gu^etlichen willen, wand der selben zwen auzzer lands sind, darvmb so verpind ich mich Meinhart der Tenke von Rossatz mit meiner hausfrowen Elzpeten vnd mitsampt vns mein Sweher Arnolt fu^er weycharten vnd fu^er Petrein sein Sv^en den egenanten weingarten von in auzzerichten an allen chrieg. Darvber pin ich jans von Chv^enring obrister Schenk in O^esterreich vber den oft genanten weingarten Duringes des Letzen, seiner hausfrowen vnd ir paider Erben rechter gewer vnd scherm, als Purchrets reht ist vnd des Lands sit vnd gewonhait in O^esterreich vnd darvber gib ich in den offen Prief zv^e einem getzeug versigelt mit meinem Anhangunden jnsigel nach Christi gepu^erd Dreutzehen hundert jar vnd in dem Ain vnd Dreizzigisten jar des Mitichens an Sand Georij Tag.

Source Fulltext: OÖUB 6 (Wien 1872) S. 13f., Nr. 12