WJr Ott von gotes gnaden Hertzog ze Oˆsterrich vnd ze Steyr Tu^en chunt offenlich mit disem brief allen den, die ihn ansehent, lesent oder horent lesen Daz fûr vns chomen vnser lêut in der Nevstift vnd habent vns fûrgelegt irn gebresten, den si an dem Gotesdienst vntzher gehabt habent, vnd darvmb, daz in fûrbaz von irem Pfarrer, wer zv den zeiten da ist, ewichlich alle veyrtage vnd Hohtzeit Messe gesungen werde vnd der Gotesdienst desterbaz begangen werde ze rehter zeit, als in andern pfarren sitlich vnd gewonleich ist, So habent si mit veraintem mu^et vnd mit vnsrer vnd des Pfarrer daselb gunstvnd gûtem willen auf sich gelegt vnd sich vor vnser verpunden daz ieder pavman vnd alle sein nachkomen, der haus und hof hat in der selben Pfarre vnd in die Purch ze Steyr mit dienst gehoret vnd geschriben ist, aller ierichlich vnd ewichlich geben vnd dienen sol dem vorgenanten Pfarrer, der dann da ist, ze Sand Miehels messe einen halben metzen Chorns oder dafûr, als vil er werd ist, Vnd daz diser sache fu^erbaz ewichlich also stêt beleibe, haben wir in disen brief gegeben nach irr pêt ze ainem offenn ûrchunde versigelten mit vnserm Insigel. Der ist geben ze Steyr, da man zalt von Christes gebûrde Dreutzehen Hvndert iar vnd darnach in dem Ainz vnd Dreizzigisten iar des Mitichens nach dem Svnntag, wenn man singt Misericordia dominj.

Source Fulltext: OÖUB 6 (Wien 1872) S. 11f. Nr. 10