Ich Marchart der Prevhauen vnd ich Margret sein Housvrow vnd vnser payder Erben Wier veriehen offenbar mit disem brief allen den, di in sehent, lesent oder ho^erent lesen, di nu lebent oder hernach chunftig werdent, Daz wir mit wolverdachtem mu^et mit gesampter hant vnd mit aller vnsrer Erben gu^etem willen vnd gunst tze der tzeit, do wier ez wol getu^en mo^echten, verchouft vnd tze chouffen haben geben Marcharten dem Venken vnd seinen Erben Vnser Hueb tze Rachsendorf in Syrnikcher Pfarre gelegen vnd di Inwertsaygen ist gen Steyr, versuecht vnd vnuersuecht mit allen den Nutzen, die dartzu^e geho^erent, vmb Sechtzikch pfunt Wyenner pfenning, der wier gantz vnd gar verricht vnd gewert sein, Vnd schullen auch sev mit der vorgenanten Hueb allen iern frumen schaffen mit versetzen vnd mit verchouffen oder geben, wem sev wellen, an allen chrieg vnd iersal. Wer aber, daz sev dhaynen chrieg darauf gewunen, den schulle wir in auzrichten gantz und gar an allen iern schaden Vnd schullen daz haben auf vns vnd auf aller vnsrer hab, wo di gelegen ist. Vnd daz di rede vnd die sach fu^erbas ewikchlich also staêt vnd vntzebrochen beleib, Darvber so geben wier disen Brief tze einem offen vrchund vnd tze einem warn getzeug vnd tze einer ebigen vestigung diser sach versigelten mit vnserm Insigel Vnd mit Hansen dez Rauscher Insigel, der tze den tzeiten Burgraf waz tze Steyr. Der Brief ist geben, do man zalt von Christes gepu^erd Dreutzehen Hundert Jar, Darnach in dem Drev vnd Vierczkisten Jar an Vnser Vrown tag ze Liechtmiss.

Source Fulltext: OÖUB 6 (Wien 1972) S. 437, Nr. 432