Ich Perbeyn offen vnd tvn chvnt an disem brif allen den, di in lesent, sehent oder horent, di nv lebent oder noch sint chvnftig, Daz ich mit verdachtem mv^et vnd mit gutem meinem willen han geben hintz gersten den herren in die Oblay daz gut datz dem geneist ober halbes des dorfes in Molntal, daz ich van Maricharten van aw vnd van allen sein erben han redleich vnd reht chauft, vnd dient alle Jar an sant Merteins tag ein halb phunt phenning wienner mvnz vnd zwai hvner dem oblayer, vnd svln die herren alle Jar meiner sel gedenchen mit Vigili vnd mit einer sel messe. Vnd ist daz geschehen, da van christes geburde ergangen warn drevzehen hundert Jar vnd dar nach in dem vier vnd viertzisten Jar an dem Svnbentag In der Zit, vnd Jans der Rauscher gewaltiger phleger vnd purchraf ze steyr was. Der brif ist Versigelt ze einem ewigen vrchvnde mit des rauscher insigel vnd mit hern Marchartz des prevhafs vnd mit hern Otten des Schecken Insigeln.

Source Fulltext: OÖUB 6 (Wien 1872) S. 483f., Nr. 480