Ich peter der Stroelcer vergich offenwar an disem prief Vnd tuen chvnt Allen den, di in Sehent oder horent lesen, Daz ich meinem Swager Otten dem Hinderholczer vnd meiner lieben Swester Christein vnd allen ieren erbern (sic) ze chauffen geben han meinez aygens ain guet jn dem lach genant in hoedershof (sic) pfarr gelegen, besuecht oder vnbesuechts vnd pin auch dez Selben guetez ier gewer, wo in dez nat geschiecht. wie tan schaden si daran naemen mit recht von mier oder von meinen erben, den Sol ich vnd mein erben jn ablegen vnd Schvllen Si daz haben auff aller meiner hab, die ich han jn den land ze ostereich. Daz in daz Staet vnd vnverchert beleib, darvber gib ich vorgenanter peter der Straelaer jn disen offen prief versigelten mit meinem anhangvndem jnsigel vnd ist der prief geben,do von christez gepuerd warn ergangen drevzehenhvndert iar, darnach jn dem Sechs vnd vierczikistem iar An sand Michahels tag.

Source Fulltext: OÖUB 6 (Wien 1872) S. 560, Nr. 554