Ich Thoman Thomans sůn weilent diener ze Gersten vnd purger ze Steir, dem got genad, vnd alle mein erben, wi die genant sint, di nv lebent oder noch chu^enftich werdent, vergehen vnd tun chunt allen den, di disen brief an sehent oder ho^erent lesen, Daz wir mit wol bedachtem mu^et vnd mit gu^etleichem willen vnd gunst aller vnserr erben vnd friunt zu den zeiten, do wir ez wol getu^en mochten, recht vnd redleich ze chauffen haben gegeben vnserm lieben swager Symon in dem Grimmen o(?)tt purger ze Steir vnd allen seinn erben vnser halffentail an den sehs gu^ettern, der drev gelegen sint an dem Aschach in der Garnwaid vnd die andern drev in dem O^ebleinstal in Molner pharre, die vnser rechtz lehen sint von vnserm genadigen herren hertzog Albrechten hertzog in O^esterreich vnd in Steir mit allen den nu^etzen vnd rechten, di dar zu geho^erent, besucht oder vnbesucht ze holcz ze feld gestift oder vngestift oder wi daz genant ist, vnd haben in daz gegeben vmb viertzich phunt phenning wienner mu^enzze, der si vns gar vnd gaentzlich verricht vnd gewert habent zu vnserr an ligender not also, daz si mit den genanten gu^eten fu^erbas imer mer allen iren fru^emen schu^ellen schaffen mit vnserm gu^etlichen willen, mit versetzen mit verchauffen oder zu wev ez in not geschiht, vnd schu^ellen auch des ir scherm vnd ir gewer sein fu^er aller erben ansprach, als des lantz gewonhait vnd recht ist. Vnd taet wir dez nicht, swi getann schaden si des naemen, den ir ains gesagen mo^echt bei seinn trewen, den su^ellen si haben auf vnsern leiben vnd auf aller vnserr hab, wo wir die indert haben besucht oder vnbesucht, vnd swo si di an choment, do schu^ellen si des selben schadens mit vnserm gu^etleichen willen von bechomen. Daz daz also stat vnd vnzerbrochen behalten werd, geb wir in disen brief versigelt fu^er vns vnd vnser erben, wann wir selb aigener insigel nicht enhaben, mit des erbern herren hern Albrechtz von Atzenpruk zu den zeiten purkgraf ze Steir anhangendem Insigel, der der genanten gu^et lehen herre ist an der fu^ersten stat, mit hern Friderichs des Chersperger zu den zeiten stat richter ze Steir vnd hern Otten des Pauzzen anhangenden Insigeln, di der genant vnd oben geschriben sach vnd handelumb geziug do mit sint, vnd ist geschehen, do man zalt von Cristes gebu^ertt dreuzehenhundert jar vnd dar nach in dem Nevn vnd virtzichistem Jar an sant Jacobs tach.

Source Fulltext: OÖUB 7 (Wien 1876) S. 117f., Nr. 118