Ich Ott der Po^emer vnd ich Ann sein hawsvrow, Wir Vlreich und Volchwein sein bru^eder mit sampt allen vnsern erben veriehen offenbar an disem brief allen den, di in sehent oder ho^ernt lesen, di nv sind oder hernach chunftich werdent, daz wir mit verdachtem muet, nach rat vnserr pesten frewnt verchauffet haben ledichleich den erbaern gaeistleichen herren dem abpt vnd der sampnung des gotshaws ze Gaersten zwaintzik phenning iaerchleichs gelts mit allen vnsern rechten, die wier emalen haben gehabt, wie die genant sind, auf irr Hofstat an dem Schalhartsperig vnder der Leiten vmb ein phunt wienner phenning, der wir gar vnd gaentzleich gewert sein vnd haben in daz selb gelt vnd recht auf gegeben mit rechter fu^erczicht nach des landes recht also beschaidenleichen, daz wier noch dehainer vnserr erben oder frewnt fu^erbaz dar an dehain recht suchen oder haben schůllen. Waer aber, daz in die vorgenant gu^elt von ieman chrieghaft wu^erd, den schulle wir in slecht vnd richtich machen. Taet wier des nicht, so schulle wier in allen den schaden ab legen, den sev ze hof oder ze taiding mit chost oder mit raisen dar auf nemen, vnd schullen sev den selben schaden haben vnuerschaidenleichen auf vnsern trewn vnd auf aller der hab, die wier haben in dem land ze O^esterreich. Daz diser chauf vnd die gelu^eb, als sev vorbenant sind, staet vnd vnczebrochen ewichleich beleiben, des geben wier den egenanten herren vnd dem gotshaws ze Gaersten disen offenn brief versigelten mit meinem obgenantes Ottes des Po^emer jnsigel vnd wenne wier VlreicJi vnd Volchbein sein brüder aigener jnsigel nicht enhaben, haben wier gebeten die erbern herren hern Stephann von Hohenwerch vnd hern Weicharten von Topel vmb ir jnsigel, die sev dar an ze einem v^erchund vnd warn geczeug geleget haben. Des ist auch getzeug Wolfhart der Han, der der selben gu^elt chaufman gewesen ist. Der brief ist gegeben, do von Christes gebu^erd ergangen warn dreuczehen hundert jar, dar nach in dem fumftzkistem jar an sand Gyligen tag.

Source Fulltext: OÖUB 7 (Wien 1876) S. 197f., Nr. 196