Wier Michel von Gotes gnaden abt vnd di gantz bruederschaft des conuentz tzv Gaersten veriehen offenbar mit disem brief allen den, di in sehent oder lesen ho^erent, daz wir in genummen vnd enphangen haben von herrn Perchtolten von Losenstain daz gu^et an dem Tzyegelhof, daz aygen ist vnd dient alle jar an vnser vrawntag zder dienst tzeit fünf schilling alter wienner phenning vnd an sand Jorgen tag auch fünf schilling alter wienner phenning fur all vadrung, dar vmb hab wir vns verlubt vnd verpunden, daz wir jerleich an sand Jacobs tag des selben nachsts singen schullen ein gantze vigili vnd des morgens dar nach ein gesunge selmess mit sechs brinnunden chertzen pei der par vnd mit lewten, als dar tzv^o geho^ert herrn Gundachern vnd seiner wiertinn vrown Annen von Losenstayn vnd iren erben jartag vnd iern selln zehilf vnd ze trost. Vnd jerleich des suntag nachtes vor dem auffertag ein gantze gesunge vigili vnd des mentags morigen dar nach ein gesunge selmess auch mit sechs brinnunden chertzen vnd mit lo^ewten, als dar tzv^o geho^ert ze igleicher zeit ze payden jartagen herrn Perchtolden vnd seiner wiertinn vrown Margreten von Losenstayn jartag vnd iern selln zehilf vnd ze tro^est, vnd dar vmb schol man v^ens von den vor genanten phenningen ze igleichen jartag raichen vnd geben den herren in den conuent ein halb phunt phenning vnd in di gustray sechtzk phenning fur di chertzen vnd fur daz lo^ewten. Vnd wenn daz ist, daz herr Perchtold von Losenstayn ab get vnd nicht mer ist, so schull wir seinen jartag begen auf den tag, vnd er verschaiden ist, vnd schullen im vnd seiner wiertinn vrown Margreten dar an begen gantz vnd gar tzv allen dem rechten, als vor geschriben ist. Taeten wir des nicht oder ob wir daz indert savmeten an ehaft not ze drin vierzehen taegen, so schol sich herr Perchtold oder herrn Gundachers erben des vorgenanten gu^etz vnderwinden so lang daz wir er vullen, daz vor versaumpt ist. Daz di sach vnd di wandlung vnzebrochen furbaz beleib, dar vber geb wir abt Michel in disen brief versigelten mit vnserm anhangunden insigel vnd mit vnsers conuents anhangunden jnsigel. Der brief ist geben nach Christes gepu^erd drewzehen hundert jar, dar nach in dem aynz vnd funzkistern iar an dem heiligen Pericht tag.

Source Fulltext: OÖUB 7 (Wien 1876) S. 219f., Nr. 217