Ich Jans der Steger, ich Purchart der Steger wir paid pru^eder, vnser hausfraw^oen vnd alle vnser erben, di wir haben oder noch gewinnen, vergehen vnd tůn chunt allen den, die den brief sehent oder ho^erent lesen, daz wir mit wolverdacbtem můt vnd mit gůlichem willen aller vnsrer erben zu der zeit, do wir ez wol getu^en mochten, nach rat vnserr pesten friunt recht vnd redlich ze chauffen haben gegeben vnserm swager Perchtolden vnd seiner hausfrawen Elspeten vnserr swester vnd allen irn erben, die si habent oder noch gewinnent, vnser haůs gelegen ze Steir aůf dem perg zwischen des Prevhaven haůs vnd der Lobnicher haůs, vnd ain lůs in dem purchueld gegen dem genanten haus gelegen mit allen den rechten vnd nu^etzen, di darzů geho^erent besucht vnd vnbesucht, vmb sibenthalbs vnd zwaintzich phunt pfening wienner mu^ensse, der si vns gar vnd gaentzlich verricht vnd gewert habent, wir sullen auch des genanten haůsse vnd lusse ir gewer vnd scherm sein fu^er alle chrieg vnd ansprach, vnd sullen in die aůsrichten. Taet wir des nicht, swelhigen schaden si des naemen, den ir ains gesagen mach bei seinn trewen, den su^elle wir in gantz vnd gar widerchern vnd su^ellen auch den haben auf aller vnsrer hab, wo wir die di [sic] haben besucht oder vnbesucht, vnd mit vnserm gu^etlichem willen davon bechomen. Daz daz also staet vnd vnzerbrochen beleib, geb wir ped Jans vnd Purchart die Steger fu^er vns vnd vnser erben den brief versigelt mit vnser paider anhangenden insigeln, vnd zu ainer warn geziuchnůsse mit hern Jans des Schekhen zu der zeit purggraf ze Steir anhangenden insigel, der der selben gůt lehenherre ist an der fu^ersten stat, vnd ist geschehen, do man zalt von Christus gepu^ertt dreuzehenhundert iar, in dem zway vnd fu^enfczichistem iar an dem pfincztag in der ersten vastwochen.

Source Fulltext: OÖUB 7 (Wien 1876) S. 277f., Nr. 272