ICH Chuenrat der Swertfurb burger ze Halle, jch Jans sein aydem, mein hausfrow Elspet vnd all vnser eriben, wi di genant sind, veriechen offenbar mit disem brief allen den, di in sechent oder horent lesen, daz wir mit wolbedaehtem mut vnd nach rat vnser vreunt ze der zeit, ynd wir ez wol getu^en machten, auz vnserm nucz vnd gewer recht vnd redleich zu chouffen haben geben daz guet am Praewneizperig pei Hall ze holcz ze veld ze wismat mit alle dew, vnde darzu^e geho^ert, wi daz genant ist, den erbern geistleichen herren herren Hermon dem Ponhalben vnd dem conuent ze Gersten vmb zwai vnd dreizzik phunt wienner phenning, der wir gancz vnd gar gewert sein, vnd sein ouch wir dez guets ir gewern, als dez guts recht in der hofmarich ist. Nemen si darvber dhain schaden mit recht daran, den schullen wir in ablegen vnd widercheren vnd schullen si daz haben auf vns vnd vnserm gut, wo wir daz haben oder noch gewinnen in dem land ze O^esterreich vnd ob der Ens, vnd davon bechomen an recht mit vnserm gutleichen willen, wo si dez bechomen mu^egen, auf wazzer vnd auf land so lang, vncz wir daz vorgenant guet gar ouzrichtig vnd an chrieg machen dem vorgenanten gotshous ze Gersten. Darvber ze einem waren vrchunt eben wir disen offen brif versigelt mit dez erbern hern hern Perichtoldes von Losenstain, der ze der zeit gewaltig waz ze Ror, anhangendem insigel, wand wir aigner jnsigel nicht haben, vnd sind dez zeug Ott der Riczenwinchler vnd Gotfrid der Sinzenperger mit iren jnsigeln. Der brif ist geben nach Christi gepurd tousent drewhundert jar, darnach in dem zwai vnd fumfczkistem jar an sand Veyts tag.

Source Fulltext: OÖUB 7 (Wien 1876) S. 286f., Nr. 282