Ich Chunrat Jans s^on an dem Aigen vnd ich Agnes sein haůsfraw^oe ynd mit vns alle vnser erben vergehen vnd tůn chůnt allen den, die den brief sehent oder ho^erent lesen, daz wir mit wolverdahtem můt vnd mit gu^etlichem willen zu der zeit do wir ez wol getůn mochten, nach rat vnserr pesten friunt haben ze chauffen gegeben recht vnd redlich vnserm vetern Perchtolden Hainrichs sun von Grůbe vnd seiner hausfraw^oen Elspeten vnd allen irn erben alles vnser recht an dem Aigen, daz do freysaezzen recht ist von Gaersten, ez sei freisaezzen recht oder irbeschaft von vnserm vater Jansen, der ez aůs dem grůnd gepawen hat, oder swaz wir daran gehabt haben, ez sei versacht oder vnuersucht, mit allen den rehten vnd nu^etzen, die darzv geho^erent, swi die genant sint, vmb viertzich pfunt pfening wienner mu^ensse, der si vns gar vnd gentzlich verriht vnd gewert habent mit beraiten pfening zv vnserr anligender notdurft. wir su^ellen auch dez chaůffes ir gewer sein fur alle chrieg vnd ansprach nach dez gotzhaůsse ze Garsten freisaezzen reht. Daz daz also staet vnd vnzerbrochen behalten werd, gib ich obgenanter Chu^enrat fu^er mich vnd alle mein erben den brif versigelt mit meim anhangenden insigel, vnd zv ainer gv^oten geziuchnu^esse mit meins o^ehaims Wu^elfings dez Chresselings vnd Stephans dez Ponhalm anhangenden insigeln vnd ist geschehen, do man zalt von Christi gepůrtte drevzehenhundert iar vnd darnach in dem vier vnd fu^enfczichistem iar an sant Thomas abent.

Source Fulltext: OÖUB 7 (Wien 1876) S. 390, Nr. 379