ICH Marichart der Venkk ich Agnes sein hausfraw ich Symon ich Jans paid sein sv^en vnd vnuerschaidenleich all vnser erben wier veriehen, vmb daz guet gelegen datz der Aych in Aschaher pfarr, daz vnser rechtz aygen ist von allter vnd daz ierleich dient sechtzich pfening an sand Jo^ergen tag vnd ain halbs pfunt pfening an vnserr vrowen tag zu der dienstzeit alter wienner mv^onzz, daz wier dasselbe guet mit allen den nu^etzen vnd rechten di darzue geho^erent ledichleich aus vnserr nutz vnd gewer haben gegeben zu ainem ewigen selgeraêt den herren in den conuent datz Gaersten in ier oblay durich vnserr vnd durich aller vnserr voruodern vnd vnserr nachchomen sel hail also, daz wier fu^erbaz chainerlay zueuersicht nicht mer schu^ellen noch mu^egen gehaben auf daz selb genant guet jn so^eliher maynung, daz si vns vnd allen gelaubigen seln darvmb ewichleich einen iartag begen schu^ellen mit einer gesungen vigili an dem dri^etten tag vor sand Peters tag ierleich vnd an vnderloz dez margens darnach mit ainer gesungen selmesz nach ires ordens gewonhait vnd nach ierr gewizzen, vnd schol in swelker vnder in ir oblayer ist desselben tags raihen vnuertzogenleich segchs schilling phenning di vor benant sind. Vnd darv^eber zu einem waren vrchu^end geben wier in den prief versigelt mit mein egenantz Marichharts des Venkken anhangunden jnsigel, vnd zu einer pezzern sichherhait bestaetigt vnd versigelt mit vnserr frevnt anhangunden jnsigeln Goetfritz des Sintzenperger zder zeit purcgraf datz Ort vnd Perichtoltz auf dem perig, di paid des gescha^efftz zeug sind mit iren jnsigeln, di si habent an den prief gelegt durich vnserr gepet willen in an schaden. Der gegeben ist drevtzehen hundert iar darnach in dem sechkisten iar an sand Oswaldes tag.

Source Fulltext: OÖUB 7 (Wien 1876) S. 705, Nr. 701