Ich Jeut Velreich Hainolts, dem Got genad, witib von Wesendorf vnd alle mein erben wir vergechen offenleich, daz wier ze chauffen haben gegeben Erasem dem Schreiber von Steyr seiner hausvrowen vnd seim bru^eder Jansen vnd allen seinn erben vnser zwen weingarten, der ainer genant ist div Diemutleitten vnd davon man jaerleich raicht an sand Mychels tag zwen phening ze purchrecht wer ie zu den zeitten richter ist in der Wachaw, vnd dem Flanderain helblinch, der ander genant der Raelaizz, davon mann raicht vir phening in dez Preusleins hof ze purchrecht vnd dem vrownchloster ze Tiernstain zwen emmer weins, mit der perchmaister hant vnd auch mit aller staet vmb vierczikh phunt phenning gemainer wienner muenzz, der in mein obgenanter wiert schuldig ist beliben fu^emf vnd zwainczk phunt bei seinn lemtigen tagen, vmb div andern er vnser brief von den juden geledigt hat, wier sullen auch der egenanten zwaier weingarten ier gewer vnd verantburter sein an aller stat nach purchrechts recht in dem lant ze O^estreich. Taet wir dez nicht vnd naemen si dez chainn schaden mit recht den ier ains gesprechen mag bei seinn trewen an ayd, den sulle wir im widerchern, vnd dafuer secz wir in ze ebenteur vnser zwen weingarten, der ain ist genant daz Mitterek vnd den obern Raelaiz vnd alle ander vnser hab wo wir div haben haupguets vnd schadens davon becho^emen mit vnserm guetleichem willen. Vnd der sach ze vrchunt geb wir in den brief versigelt mit dez erbern mans Nyclas dez Juden anhangunden jnsigel zu der zeit richter in der Wachaw, vnd zu ainer gueten gezeuchnuzz mit Fridreichs dez Schaffer von Senftenberch vnd Steffans dez Ponhalms jnsigeln inn an schaden. der brief ist geben tausent iar drevhundert iar im sechkisten iar an sand Pauls tag.

Source Fulltext: OÖUB 7 (Wien 1876) S. 702f., Nr. 699