ICH Chunrat der Mu^echler vnd mein hawsfrawe Chunigund vnd mit sampt vns alle vnser Erben wi die genant sind wir veriehen und tu^en chunt offenleich an dem prief vor allen lewten gegenwurtigen vnd chunftigen, daz wir mit wol bedahtem muet vnd mit gunst nach rat vnser pesten frewnt zder zeit do wir ez wol mit reht tuen mohten reht und redleich ze chauffen haben geben dem Erbern beschaiden Weynmarn dem Tewerwanger vnd seiner hawsfrawn Chunigunden und allen ieren Erben unser hu^eb genant die Cho^erbelhueb in Aschaher pharre gelegen aus vnser nutz vnd gewer in die ieren mit allen den rehten und nu^etzen si sein chlain oder groz die darzu^e geho^erent ze holtz ze velde ze wismad ze waid versueht vnd vnuersueht, vmb ain gelt dez si vns gantz vnd gar geriht vnd gewert habent mit berayten phenning also, daz wir noch alle vnser Erben hintz der vorgenanten hu^eb nymmer mer dhain ansprach sullen haben ewichleichen weder wenig noch vil. wir sullen auch der vorgenanten hu^eb ier gewer sein fu^er allen chrieg vnd ansprach wo in dez no^et geschieht, ze hof oder ze tayding nach landes reht. Stu^ende in darvber indert dhain chrieg auf dez sew schaden na^emen, denselben schaden sullen sew haben datz vns vnd vnsern trewn vnd auf aller vnser hab wo wir die indert haben und dez dovon becho^emen mit vns vnd vnser erben gu^etleichem willen vnd wort an alles reht wir sein lempnt oder tode. Vnd dar vber daz der chauf also furbas sta^et und unverchert beleib, Gib ich in vorgenanter Chunrat der Mu^ehler fu^er mich vnd fur alle mein erben dem vorgenanten Weynmarn vnd seinen Erben den prief versigelten mit meinem aygen anhangunden Insigeln, Vnd dar zu^e durich pezzer getzewgnuzze willen diser sache versigelten mit dez Erbern herren hern Otakchers von Ro^er zden zeiten purgraf ze Steyr der der vorgenanten hu^eb lehen herre ist an der fu^ersten stat von Ostereich, vnd mit dez Erbern Ritter hern Niclasen dez Hayden zden zeiten Schaffer ze Steyr anhangunden insigeln. Der prief ist geben nach Christi gepu^erde vber drewtzehen hundert Jar darnach in dem ains vnd sechtzgisten Jar dez Sunntags ze mittervasten Letare.

Source Fulltext: OÖUB 8 (Wien 1883) S. 6f., Nr. 6