ICH Erasm der Schreiber purger ze Steyr und ich Chunigund sein hawsfrawe und mitsampt uns alle unser erben wie die genant sind wir verjehen und tun chunt mit dem offen prief vor allen lewten gegenwu^ertigen und chunftigen, daz wir mit wolbedahtem mu^et zder zeit do wir ez wol getu^en mochten recht und redleichen dem erbern Jansen von Villach Jansen sun von Halle purger ze Steyr und seiner hawsfrawn Katreyn und allen ihren erben verchaufft haben unser gu^et genant ze Weichszelpawm in Chemnater pharr gelegen, daz wir eemaln von in chaufft haben, daz lehen ist von dem hertzogen, mit dez erbern ritter hern Niclasen dez Haiden hant zden zeiten schaffer ze Steyr, der dez selbigen gu^ets lehenherre gewesen ist von der fu^ersten wegen an dez erbern hern hern Otakchers vor (sic) Ror stat, der zden zeiten purgraf ze Steyr gewesen ist, aus unser nutz und gewer in die ieren mit allen den rechten und nu^etzen und darzu^e gebo^ert ze holtz ze velde besu^eht und unbesu^eht in allen den rechten, und ez eemaln aus ierer gewalt in die unsern cho^emen ist, umb ain gelt dez wir gantz und gar gericht und gewert sein, also daz wir noch unser erben dhain ansprach hintz dem vorgenanten gu^et nimmermer sullen haben weder wenig noch vil. Ich sol auch vorgenanter Erasm dez egenanten gu^ets ir gewer sein nach landes recht fu^er allen chrieg und ansprach, und daz der chauf fu^erbas stat und unverchert beleib, daruber gib ich in vorgenanter Erasm den prief zu^e einem waren getzewgen und besta^etigunge diser sach versigelt mit dez erbern ritter hern Niclasz dez Haiden mit dez hant der chauf geschehen ist, und mit Stephan dez Ponhalm anhangunden insigeln die diser sache gezewg sind mit ieren insigeln in an schaden, wand ich aygens insigels nicht enhan. Der prief ist geben nach Christi gepu^erde drewtzehen hundert jar darnach in dem ains und sechtzigisten jar dez su^enntags vor der liechtmesse.

Source Fulltext: OÖUB 8 (Wien 1883) S. 1f., Nr. 1,