ICH Niclas der Hayden vnd mein hawsfrawe vnd mit sampt vns alle vnser Erben wie die genant sind wir veriehen vnd tuen chunt offenleich an dem prief den die den prief an sehent hoerent lasen oder lesent, die nu lebent vnd hernach chunftig werdent, daz wir mit wol bedachtem muet vnd mit gunst vnd willen aller vnser Erben vnd nach rat vnserpesten frewnt zue der zeit vnd wir ez wol mit recht getuen moechten vnd ez neimant wider sprechen mocht noch widersprach, recht vnd redleich ze chauffen haben geben vnser gu^et genant auf dem Drischelperg pei der Pirichen in Ga^erstner pharre gelegen, daz weilen Otten dez Ro^esleins gewesen ist und daz lehen ist von unserm genedigen herren hertzog Ru^edolfen ze Osterreich, dem erbern manne Weynmarn dem Tewerwanger purger ze Steyr vnd seiner hawsfrawn Chunigunden und allen seinen erben aus vnser nuetz vnd gewer in die ieren mit allen den rechten vnd nutzen vnd darzue gehoerent ze holtz ze veld ze wismad ze wayd ze wasser versuecht vnd vnuersuecht vmb ain gelt dez sew vns gantz und gar gericht und gewert habent. Wir sullen auch dez selben gu^ets ir gewer sein fu^er alle ansprach ze hof ze Tayding wo in des not vnd durft geschieht, nach landes recht. Gienge in daran aber icht ab, daz sullen sewhaben datz vns vnd vnsern trewen vnd darzue auf aller ander vnser hab, wo wir die haben auf wazzer oder auf lande vnd dez do von bechoemen mit vns vnd aller vnser erben geutleichem willen vnd wort an aller vnser irrung so sew nachst mugen, wir sein lemptig oder tod. Daz die red furbas sta^et vnd vnuerchert beleib darvber gib ich Niclas der Haiden Weinmarn dem Tewerwanger vnd seinen Erben den prief fu^er mich vnd alle mein erben zu^e einem waren vrchunde der warhait versigelten mit meinem anhangunden Insigel, und durch pezzer urchuende und sicherhait willen mit dez Erbern Ritter herren Niclasen dez Schechen zu^e den zeiten purgraf ze Steyr anhangunden Insigel, mit dez hant vnd willen der chauf geschehen ist und der dez obgenanten gu^ets rechter lehen herre gewesen ist an der fu^ersten stat, und mit Gotfrids dez Sintzenberger anhangunden Insigel die der selben sache vnd wandlung getzewgen sind mit ieren Insigeln in vnd ieren Erben an schaden. Der prief ist geben nach Christi gepu^erde uber drewtzehen hundert Jar darnach in dem zwai vnd sechtzgisten Jar an sand Jo^ergen tag.

Source Fulltext: OÖUB 8 (Wien 1883) S. 74f., Nr. 72