ICH Hainreich der Prehafen und mitsampt mier all mein erben tuen chunt umb di waid gelegen pei der Rawmnichk zenegst dem guet daz genant ist in dem Pletichech di unser aygen gewesen ist, daz wier di selben waid haben geben ze chauffen dem ernwirdigen herren hern Erharten abbt datz Gersten und seinem gotshawzz umb ain gelt des wier von im gantz und gar sein gewert und verricht, daz wir fu^erbaz auf di selben waid und auch auf die pewnt zenegst dapei gelegen, danach wier mit in gechriegt haben, fu^erbaz chain ansprach nicht mer schu^ellen haben. Daz di red also fu^erbaz stet beleib, des gib ich obgenanter Hainrich Prehafen den prief zu ainem waren urchu^end mit meinem anhangunden insigel versigelt, und ist des zewg mit seinem anhangunden insigel im an schaden der erber ritter her Nicla der Schechk purgraf ze Steyr nach des rat di wandlung ist geschehen. Der prief ist geben nach Christs gepu^erd uber drewtzehenhundert jar und im drew und sechtzkisten jar an des heiligen chreutz tag in dem heribst.

Source Fulltext: OÖUB 8 (Wien 1883) S. 156, Nr. 150