Wir Rudolff der vierd von Gotes gnaden erczhertzog ze Osterreich ze Steyr und ze Kernden herre ze Krayn auf der Marich und ze Portnaw, grafe ze Habspurg ze Tyrol ze Phyrt und ze Kyburg marichgrafe ze Purgow und lantgrafe in Elsazz tu^en kunt, daz fu^er uns komen unser getrewer Hertneid vom Turn und hat uns aufgehen vier gu^et an dem Fůrtte gelegen in dem Hinterperg im Enstal, und vier gu^et daselbs in dem Hinterperg gelegen ze Verrern Rewtt die er von uns ze lehen het, und pat uns daz wir die lihen unserm getrewen Olten dem Almer wan er die von im gechaufft hiet, daz haben wir getan und haben denselben Otten dem Almer und seinen erben su^enen und tochtern die vorgenanten gu^eter ze rechtem leben verlihen, darauf er auch die erbern Agnesen Hainrichs to^echter des Tumerstorffer sein hawsvrawen mit unsrer hant gůnst und gutem willen geweiset hat fu^er hundert phunt wienner phenning irr morgengab und fu^er hundert phunt wienner phenning an irm heyrattgu^et also, daz si diselben zwai hundert phunt wienner phenning darauf haben sol als morgengab heyratguts und des landes recht ist in Steyr, uns unsern pru^edern und erben unschedlich an der lehenschafft. Und des ze urchund geben wir disen brief besigelt mit unserm anhangunden insigel, der geben ist ze Wienn an suntag als man singt Oculi in der vasten nach Christs gepurd dreu^eczehen hundert jar darnach in dem vier und sechtzigistem jar unsers des vorgenanten hertzog Rudolffs alters in dem fu^emf und zwainczigisten und unsers gewalts in dem sechsten jare.||
+ Hoc est verum. +||
Domerstorffer.

Source Fulltext: OÖUB 8 (Wien 1883) S. 167f., Nr. 163