ICH Hainreich der Chersperger mein hausfraw und unser paider erben wier verjehen, umb daz gu^eetel genant di Sumermu^el gelegen pei Lantzenperg in Hedigeinsperger pfarr daz unser rechts vreys aygen ist, daz wier dasselb gu^eetel mit allen den ern rechten und nu^etzen so durich recht darzue geho^ert alz wier ez inne haben gehabt, geben ze chauffen Artolfen an der Strazz zder zeit Gerstner amman, seiner hausfrawn und ier payder erben aus unsrer nutz und gewer in di ier ledichleich umb fu^emfundzwaintzk pfunt pfening wienner mu^enzz der wir von in gantz und gar gewert sein und verricht in sogetaner maynung, daz wier desselben genanten gu^eetleins an der Sumermu^el schu^ellen ir scherm und ir gewer sein fu^er alleu ansprach, alz so^elher gu^eeter recht ist und des landes recht und gewonhait ob der Ens. Daz in daz allez von uns staet beleib und unverchert, daru^eber zu ainem urchu^end der worhait gib ich in obgenanter Hainreich der Chersperger den prief versigelt mit meinem anhangunden insigel und mit meines lieben prueder insigel Artolfs des Chersperger, und zu ainer waren zeugnu^ess der handlung versigelt mit der erbern lewt insigel Otten des Stadler Niclas des juden Gerharts des Chalinger. Der prief ist geben nach Christs gepu^erd u^eber dreutzehenhundert jar darnach in dem aecht und sechczkisten jar an sand Gedrawten tag in der vazsten.

Source Fulltext: OÖUB 8 (Wien 1883) S. 371f., Nr. 377