ICH Hainreich und ich Peter pede pru^eder die Ritzenwinchler und mitsampt uns alle unser erben wir verjehen, das wir ze chauffen haben geben unsern hof ze Urtail genant, in Wolfarer pharre gelegen der inbertaygen ist gen Steyr in die purge, dem erbern manne Weinmarn dem Tewerbanger purger ze Steyr und seiner hawsfrawn Chunigunden und allen seinen erben aus unser nutze und gewer in die iren umb sechs und achtzig phunt wienner phenning der si uns sybentzig phunt berayter phenning gericht und gewert habent also beschaidenleich, ob das ist das wir in von sunebenden die nu schierist choment uber ain jar acht tag vor oder acht tag hinnach wir oder unser erben in Wemmarn dem Tewerbanger oder seinen erben die sibentzig phunt phenning hinwider geben, so schol der obgenant hof herwider unser aigenhaft ledigs gu^et sein und schol der chauf ab sein. Wa^er aber das das wir in die sibentzig phunt phenning als vor geschriben stet von sunebenden uber ain jar acht tag vor oder acht tag hinnach nicht gaeben, so schullen si uns die sechtzehen phunt phenning herzu^e geben und schol denne der hof ir aygenhafft chaufftz gu^et sein mit allen den rechten und nutzen und darzu^e geho^ert als vorgeschriben ist. Und tu^en uns auch denne desselben hofs ze fu^erzicht mit dem prief also, das wir noch alle unser erben furbas hintz dem selben hof nimmermer dhain zu^espruche noch ansprach schullen haben weder mit recht noch an recht. Wir schullen und wellen auch des obgenanten hofs ir rechter gewer sein fu^er alle ansprach, wo in des no^et und durft geschieht nach lants recht als chauffes recht. Das die red furbas sta^et und unverchert beleib, daruber geben wir ich Hainreich und ich Peter pede pruder die Ritzenwinchler Weinmarn dem Tewerbanger und seinen erben den prief fu^er uns und unser erben zu^e einem waren urchunde der warhait versigelten mit unser peder anhangunden insigiln, und zu^e einem gu^etem urchunde und getzewgen der warhait versigelten mit unsers swager Ludweigs auf dem Stain zu^e den zeiten lantrichter ob der Ens und purgraf ze Lintze und mit Petreins des Hinderholtzer unsers frewnts anhangunden insigiln. Der prief ist geben nach Christi gepurde uber drewtzehen hundert jar darnach in dem acht und sechtzgisten jar an gotsleichnams tag.

Source Fulltext: OÖUB 8 (Wien 1883) S. 384f., Nr. 388