ICH Chunrat des Schuester sun von Nustorf und ich Agnes sein housvrow und alle unser erben wir vergehen, das wier mit gu^etem willen und mit unsers pergmaisters hant hern Petreins des Mannseber zu den zeiten amptman des chlosters ze Newnburch verchoufft haben unsern weingarten gelegen an dem Sweinsperg des ain viertail ist, zenechst Frantzisken weingarten des Phabenzagels von Prag, do man von dem egenanten unserm weingarten alle jar dient dem chloster ze Newnburch ainen halben emmer weins ze perchrecht und ainen phening ze voitrecht und nicht mer, denselben weingarten haben wir recht und redleich verchoufft und geben mit alle dem nutz und rechten als wier in unversprochenleich in perchrechts gewer herpracht haben und als er mit alter herchomen ist umb zehen phunt wienner phenning der wier gantz und gar gewert sein, dem vorgenanten Frantzisken dem Phabenzagel vrown Dorothen seiner housvrown und ir paider erben fu^erbas ledichleich und vreileich ze haben und allen ieren frumen damit ze schaffen verchouffen ver¬setzen und geben, wem si wellen an allen ierrsal. Und das der chouf fu^erbas also stet und untzebrochen beleibe, und wannd wier selber nicht aigens insigils haben, daru^eber so geben wier in den brief zu einem warn urchund der sache versigilten mit des vorgenanten amptmanns insigil hern Petreins des Mannseber und mit des erbern manns insigil Petreins Hadmars sun von Nustorf darunder wier uns verpinden alles daz stet ze haben und ze laisten das vor an dem brief geschriben stet, der geben ist ze Wienne nach Christes gebu^erde drewtzehen hundert jar darnach in dem zwai und sibentzgistem jare des nechsten sambtztags nach sand Peternellen tag.

Source Fulltext: OÖUB 8 (Wien 1883) S. 593f., Nr. 591