Wier Albrecht von Gots gnaden herczog ze O^esterreich ze Steyr ze Kernden und ze Krayn graf ze Tyrol etc. tu^en kunt umb die gu^eter gelegen ze Mollen in unserr herschaft ze Steyr die Symons des Venken seligen erben ze lehen von uns gehabt habent und die vormals gewesen sind Niclas des Hayden die auch der egenant Symon der Venk durch seiner sel hail geschaffet und gegeben hat zu^e dem kloster und gotshows ze Gersten, daz wir lautterlich durch Got und durch vleiziger pet willen des egenanten Venken nechsten freunt die aygenschaft der vorgenanten gu^eter gegeben haben und geben auch den erbern geistlichen unsern lieben andechtigen dem abt und dem convent desselben klosters ze Gersten also, daz si die fu^erbas ewiklich haben und niezzen su^ellen und allen iern frumen damit schaffen und tu^en als mit andern ieren aygenlichen gůtern die si habent an alle ierrung und hindernuzze. Mit urkund dicz briefs. Geben ze Wienn an suntag nach sand Dyonisy tag nach Kristes geburt dreuczehen hundert jar und darnach in dem zwai und sibenczgistem jare. Magister curie de Liechtenstein per Hainricum notarium suum.

Source Fulltext: OÖUB 8 (Wien 1883) S. 609, Nr. 609