Ich Dyetrich und ich Rudolff paid prueder von Losenstain und all unser erben wier verjehen, daz wir Fridrichen dem Chlel und Chunigund sein hauswrawn und allen ieren erben ez sein sun oder tochter gelihen haben zu rechten lehen ffum (sic) zehenthaus di er gechaufft hat von Steffan Ledrer dacz sant Peter und von Otten dem Zyervogl dy her noch geschriben stent, ainz dacz dem Zyervogl dacz dem Hengst an der leiten zwai tail dacz dem Mulcziph auch czwai tail, auf der Lanczenod ainz und in dem dorff daz tryt tail. Si schollen uns auch und unsern erben alleu jar zu weinachten da von geben sechczehen phenning wienner muntzze, wan der vorgenant Fridrich der Chlel di vorgenanten zehent haus mit seinem aygen gut in unser gewalt pracht und gechaufft hat daz in stet und unzubrochen beleib (sic). Daruber geben wier in den brieff versigelten mit unsern anhangunden insigel. Daz ist geschehen nach Cristi geburd drewczeuhen hundert jar dar nach in dem ffum und sibengisten jaren an sand Matheus tag.

Source Fulltext: OÖUB 8 (Wien 1883) S. 775f., Nr. 753