ICH Jans ym Pach von Wesendorf und mein hawsvrowe Margret und alle unser erben wir vergehen, daz wier ze chauffen haben geben dem erbern mann Erasem dem Schreyber purger ze Steyr und seiner hausvrown und allen ieren erben unser haws mit allen nu^etzen, daz gelegen ist ze Wesendorf pdy dem pach mit alle dew und darzu geho^ert umb achtzehen phunt wienner phenning und umb ain halbs phunt der wir.gar und gantzleich gericht und gewert sein ze rechten tegen, und haben wir in daz selbig haws ledichleich aufgeben mit pu^erchheren hant dez erbern Freydangs die zeit richter in der Wochaw, dem man dovon geit ze půrchrecht in daz selb gericht fumf und zwaintzk phenning all jar an sand Michels tag und ain vaschang hu^enn und zehen ayr ze ostern und nicht mer. Und dez ze urchund geb wier in den offen prief versygelten mit dez vorge¬nanten purchherren dez erbern Freydangs anhangundem insygel, und wann ich obgenanter Jans ym pach die zeit nicht aygens insygels gehabt hau, dez han ich gepeten den erbern man Chunraten den Flander ze Wesendorf, daz er auch der sach gezeug ist mit seinem anhangundem insygel. Der prief ist geben nach Christi gepu^erd dreutzehen hundert jar darnach in dem fumf und sybentzkistem jar dez suntags nach dem o^esterleichem tag.

Source Fulltext: OÖUB 8 (Wien 1883) S. 766, Nr. 744