Wir Nycla von gots genaden Abt des Gotzhaus ze Ga^ersten vergehen vnd tuen chund allen lew^eten, di den prief sehent oder ho^erent lesen, daz wir mit wolbedachtem muet vnd mit zeitigem rat durch vnsrer, vnd vnsrer vordern sel hail willen gegeben haben vnsern lieben herren vnd Conuenttpruedern ze Ga^ersten in ier Oblay ain guet ist genant an dem loch gelegen pey dem Egelse in Pehemperger pharr, vnd dient ain phunt wyenner pfenning, auf zwen tag in dem iar, ein halbs phunt an vnser frawen tag zu der Liechtmess, vnd ein halbs phunt an vnser frawen tag zu der dienstzeit, also beschaidenleich, daz sew, alle iar, vnsern lieben herren, vnd vorsideln, Abt Micheln, vnd Abt Erharten seligen zwen iarteg davon begen, einem igleichen herren seinen iartag, zu seiner iarzeit, als er gestorben ist, mit einer gesungenn vigili vnd selmess, nach des ordens gewonhait. So haben wir in auch gegeben ein guet genant an der O^ed, do man von auch ierleich dient, an vnser frawen tag, zu der dienstzeit ein halb phunt wyenner phenning vnd ist gelegen in Ga^erstner pharr, mit der beschaiden, das si vns, di weil wir leben vnd vns got nicht vadert mit dem tad, daz datz seinen genaden stet, alle jar singen schu^ellen ein lo^ebleich ampt, vnd ein vesper von sand Kathrein, in sand Kathrein wochen, awer nach vnserm tod, so got daz wil, so schu^ellen si vns vnsern iartag mit einer gesungenn vigili vnd selmess, ia^erleich begen, als der iartag denn chu^emt, nach des ordens gewonhait. wa^er awer, daz vnser herren, an den iartegen, so vor benant ist, indert saumig wa^ern, des wir in nicht getrawn, so schol sich ein herr, wer die zeit hye ze Ga^ersten herr vnd abt ist, der obgenanten gu^eeter vnderwinden als lang, vntz daz vnser obgenant herren di saumung gantz vnd gar widervolpringen. Daz di handlung zwischen vns stet vnd vnuerchert beleib, darv^eber geben wir ze payder seitt wir vnd auch vnser Conuentt den prief versigelten mit vnser payder anhangunden insigeln, der geben ist nach Christi gepuerd v^eber drewtzehen hundert iar vnd darnach in dem Siben vnd Sibentzkisten iar an sand Go^ergen tag.

Source Fulltext: OÖUB 9 (Wien 1906) S. 238-239