Nos Nycolaus dei gratia Abbas Monasterij in Ga^ersten ordinis sancti Benedicti Patauiensis dyocesis, notum facimus omnibus presencium inspectoribus tam presentibus quam futuris, quod matura deliberacione prehabita, consilio et assensu reverendorum ac Karissimorum nostrorum fratris Wentzeslay pro tunc prioris Tociusque conuentus Monasterij prelibati, dedimus et resignauimus libere fratribus nostris prelibatis in Oblayam et consolacionem ipsorum redditus quatuor librarum minus quinquaginta den(ariis) in possessionibus infra scriptis, videlicet in possessione dicta am Stainveld vj. solidos denariorum Marie et v. solidos Georij et xij. solidos pirorum wingist. Jtem am winthag. ix. solidos Marie minus x. den(ariis), jtem aufm hochekk vj. solidos Marie minus x. den(ariis), que prescripte possessiones fite sunt in Ecclesia Stainpach. Jtem am Ho^edleinso^ed. v. solidos Marie in ecclesia Aschach. Deputauimus eciam eisdem nostris fratribus redditus, quatuor librarum minus. xxx. den(ariis) de obuencionibus prouenientibus de Curia nostra, quam conparauimus et edificauimus in Nusdorf, et de domo in Styra, quam conparauimus a Gotfrido dicto Sintzenperger, et de vinea dicta di mitter hochenwart, quam Schekchones quasi desolatam et sibi perditam donauerunt monasterio, nos vero eandem expensis proprijs reformauimus tamquam plantacionem nouellam ita, quod nos pro tempore quoad uixerimus, et quilibet nostrorum successorum abbatum sine dilacione in festo Natiuitatis virginis gloriose nominatos redditus Oblayario fratrum tenebitur ministrare, quoadusque per nos, si vixerimus, aut per nostros successores prefatis nostris fratribus redditus, ut premisimus, quatuor librarum minus xxx. denarijs in certis predijs fuerint assignati. Donauimus autem ea bona hac condicione adiecta, quod sepedicti nostri fratres in Altari sanctorum Petri et pauli in Monasterio nostro cottidianam celebrare missam in antea tenebuntur hoc ordine obseruato, quod in die dominica officium trinitatis sanctissime, feria secunda missa defunctorum, feria tercia officium sancti spiritus, feria quarta de sancto Benedicto, feria quinta. de Corpore christi, feria sexta de sancta Cruce, Sabbato de assumpcione gloriose virginis officium compleatur. Moderamus tamen hoc modo, quod in omnibus festiuitatibus missa celebretur de die, aut si frater inofficians aliquam haberet votiuam, quia tunc solam Collectam festiuitati aut votiue adiciat legens frater. Volumus autem fratri hanc missam legenti cottidie quatuor donari nummos de redditibus suprascriptis Et mandamus fratri in altari sancti Benedicti celebranti, qui prius a fundacione duo solum habuit denarios, vnum denarium cottidie de residuis obuencionibus superaddi. Si uero aliquis fratrum contumaciter, quod absit, nulla causa legittima precurrente, prefatam missam legere neglexerit, eadem die tota sua careat prebenda, et nichilominus denarios restituat, pauperibus vna cum pretacta prebenda per abbatem tunc presidentem tribuendos. Si uero quisquam successorum nostrorum in solucione memoratarum quatuor librarum minus. xxx. denarijs (!) negligens aut desidiosus extiterit, extunc volumus omnes obuenciones de Curia in Nusdorf, de vinea prius memorata et de domo in Styra, in vsus cedere fratrum omni penitus contradiccione semota, quoadusque per certas, ut premissum est, possessiones, redditus quatuor librarum minus xxx. denarijs in fratrum oblayam plenius assignentur. Si autem aliquis successorum nostrorum hec reclamare aut forte per adhesionem Conuentus sepesatam nostram fundacionem abolere voluerit, exnunc prout extunc voluntatem nostram deo resignamus, ipsosque conmittimus iusto iudici in extremo examine districcius responfuros. Vt autem prelibata nostra fundacio et donacio, rata et inconuulsa permaneat, presentem paginam tarn nostro quam eciam Conuentus nostri, cuius voluntaria admissione fecimus, sigillo duximus roborandam. Acta sunt hec Anno dominice incarnacionis Mo. CCCo. LXXXo. in die Assumpcionis Marie virginis gloriose.

Source Fulltext: OÖUB 9 (Wien 1906) S. 878-880