Ich Mathee von Chornitz di zeit Lantrichter niderthalben der Ens, meins herren . . hern Eberhartz von Chappellen, Vergich vnd tuen chvnd, Das sich berett hat, werigant der wagner, vnd sein svn peter, Vnd Michel der Můemsv^en, der intzicht, der man mir fuer pracht hat, Das si den weizzen, gehalten vnd gefuedert schullen haben, Vnd auch aller der intzicht, der man se getzigen hat, Der habent se sich recht vnd redleich berett, Des phintztags vor sand Mariamagdalentag, in dem Ampthof ze weizztra, auf des gotzhaus dingstat. ze Ga^ersten vor dem walpoten, Den des gotzhaus richter da gesatzt hat, an sein stat, in des gotzhaus recht von des panns wegen vnd ich auch wol ervaren han, Das se der intzicht vnschuldig gewesen sind. Versigelt mit meinem aufgedru^ekchten insigel, Der prief ist gegeben . . noch Christes gepuertt Dreutzehenhvndert jar, darnach in dem Achtzkistem iare des Samstags noch sand Jacobs tag.

Source Fulltext: OÖUB 9 (Wien 1906) S. 875-876