In nomine sancte et indiuidue trinitatis, patris et filij et spiritus sancti. Amen. (Nicht verlängerte Schrift.) Fridericus dei gratia dux Austrie et Styrie et dominus Carniole vniuersis presentibus et futuris, ad quos littere iste deuenerint, salutem in eo, sine quo non est salus. Ne quibus hereditate successimus, non succedamus et pietate, ab antecessorum ac patrum nostrorum deuotione et munificentia degenerare nolentes, ad reuerendj patris ac domini Ekkeberti episcopi Babenbergensis, ad quem Glevnicense monasterium pertinet iure fundj, petitionem atque consilium simulque ad instantiam venerabilis domini Pilgerimj abbatis eiusdem monasterij vniuersa, que illj Gleunicensi ecclesie liberaliter contulerunt, nos fauorabiliter approbamus et presentis pagine testimonio confirmamus. Videlicet, ut quecunque dictum monasterium possidet a quocumque sibi collata sub solius principis terre persistant et defendantur aduocatia nullique subaduocato deputari ualeant aut conmitti, nisi quem forsan abbas eiusdem monasterij ac conuentus uoluntate libera duxerint eligendum. Quam tamen aduocatiam ipse provincie princeps sine totius comodj temporalis intuitu pro remedio solummodo anime sue fideliter proteget ac defendet. Item quocunque dicti monasterij fratres res suas siue in vino siue frumento seu quibuslibet aliis siue in aqua siue in terra pro suis necessitatibus duxerint uel per suos etiam destinarint, nullum penitus de eisdem uectigal, muta siue theloneum exigetur. Item ligna quibuslibet vsibus necessaria, dum tamen non dent aliis neque uendant, in omni silua principis terre desecandj et auferendi pro ipsius presertim vtilitatibus liberam habeant potestatem. Preterea si fur aliquis seu reus sanguinis Gleunicensi ecclesie pertinens fuerit deprehensus, cingulotenus tantum iudici tradi debet, res tamen ipsius integraliter maneant in cenobij potestate. Nullique judicum seu nostrorum seu cuiuscumque de nostris ministerialibus siue in districtu nobilis dicti de Volchenstorf aliquam potestatiuam exactionem seu iurisdictionem in quibuscunque memorati cenobij prediis, hominibus aut possessionibus liceat exercere. Familia quoque nostra cum familia Glevnicensi sine ullo iuris sui dispendio matrimonia libere contrahat ac licenter. Postremo larga et libera pietate concedimus, quemadmodum felicis memorie patrem nostrum ducem Liupoldum inuenimus indulsisse, quod omnis terre nostre milites et ministeriales ac alii nobiles nominis cuiuscumque ea, que a nobis nomine pheodi aut hominij possident, pro remedio animarum suarum Gleunicensi cenobio testamentaliter libere conferant ac delegent. Futuris etiam discriminibus obuiantes presenti scripto uolumus esse cautum, ne quis abbas ecclesie Gleunicensis preter aduocati uel fundatoris seu conuentus sui licentiam et consensum quamcumque possessionem cenobii memorati alienare uel audeat uel presumat in penam cuiuscumque emptoris periculum amissionis interminantes. Ut autem hec omnia vigoris et roboris habeant firmitatem et a nullo successorum nostrorum uel cassari ualeant uel infringi, presentem concessionem sigilli nostri munimine duximus roborandam. Testibus subnotatis Heinricus de Prvnne, Chadoldus dapifer de Velsperch, Hademarus pincerna de Chvnringe, Heinricus frater suus marschalcus, Heinricus de Merswanch, Heinricus de Lihtensteine, Heinricus pincerna de Habspach, Wichardus de Arnstein, Chvnradus et Heinricus fratres de Cekkinge, Otto de Perihtoltsdorf, Otto de Rore, Otto, Ditricus, Ortolfus fratres de Volchenstorf, Gvndacharus, Ditmarus fratres de Styria, Hertnidus, Otto fratres de Trvna, Otto de Walchvnschirchen, Heinricus de Swarzense, Ebran de Ernsprvnne, Wolfker pincerna de Parawe, Richerus de Luffenberch, Otto de Pubelinge, Ditmarus de Chersperch, Chunradus de Rizenwinchel, Dietmarus de Hagwalde, Heinricus, Otto fratres de Zaucha, Bertoldus Schecho, Otacharus, Rudolfus, Albero fratres de Preheven et ali multj. Acta sunt hec in castro Styr. VIII. idus Septembris, anno domini M. CC. XXX. VIIII. regnante domino nostro Jesu Christo in eternum feliciter Amen.

Source Fulltext: OÖUB 3 (Wien 1862) S. 72-73, Nr. 66