Fridericus Dei gratia Sanctae Ecclesiae Salisburgensis Archiepiscopus, Apostolicae Sedis legatus Vniuersis Christi fidelibus per Salisburgensem prouinciam constitutis ueram in omnium Saluatore Salutem. Ciuitatis nouae Jerusalem gloriosa nobis Solemnia memorantes in terris, quotiens Domino Sacrati Pontifices ad decorem militantis Ecclesiae diuino cultui depulatis Ecclesijs Sacrosanctum munus consecrationis impendunt, ad cuius Solemnitatis sancta Mysteria a Christi fidelibus uenienda deuotionem populi nos oportet attrahere et quasi quibusdam muneribus illectiuis conuenit inuitare, vt, vbi tantae festiuitatis memoria colitur, illic etiam deuote quaerentibus pietatis gratia misericorditer non negetur. Cum itaque venerabilis Frater noster Abbas Monasterij Glunicensis Patauiensis Dioecesis Basilicam Monasterij sui ad honorem Omnipotentis Dei et gloriosae Virginis Matris suae necnon beati Andreae Apostoli procurare proponat, prout citius poterit consecrari, Nos de omnipotentis Dei misericordia et Beatorum Apostolorum Petri et Pauli meritis confidentes omnibus vere poenitentibus et confessis, qui ad diem dedicationis in monasterio Supradicto habendae deuote conuenerint, quadraginta dies de iniuncta ipsis poenitentia misericorditer relaxamus, Ratas habentes nihilominus remissiones et Indulgentias, Si quas venerabiles Fratres nostri Episcopi Sufraganei nostrae Ecclesiae in die dedicationis praedictae ac in ipsius dedicationis anniuersario pie concesserint, dum tamen statutum a Canone dierum non excedant. Datum apud Admont Anno Domini millesimo Ducentesimo septuagesimo tertio, Kalendas Augusti.

Source Fulltext: OÖUB 3 (Wien 1862) S. 398-399, Nr. 433