Petrvs dei gratia Ecclesie Patauiensis Episcopus Omnibus presentes litteras inspecturis Salutem in omnium saluatore. Si mundus esset stabilis et humana conditio non uergeret ad occasum, non esset necessarium bona gesta hominum scripture testimonio perhennarj. Hinc est, quod nos ad omnium notitiam volumus peruenire, quod vir nobilis Poppo de Grv^onenpurc ductus salubriter zelo dei jvs patronatvs, quod in Ecclesia Hedershoven sibi a suis progenitoribus ex successionis hereditate debito competebat, Glvnicensi Cenobio libere et absolute tradidit propter deum et in nostris Manibus ac presentis (sic) nomine iam dicti Monasterij resignauit id ipsum non solum spetialiter vice sua, sed et omnium heredum suorum tam presentium quam etiam futurorum. Qvia uero prefatum Monasterium per ipsius fvndatores de substantia tenui noscitur profluxisse et a nobis ac Ecclesia nostra Patauiensi nullum adhuc percepit subsidium temporale, nos uidentes studium et deuotionern sinceram Dilecti in christo fratris Chvnradi Abbatis eiusdem, quam exercet, ad promotionem Monasterij memorati premissam donationem non solum confirmare, verum etiam de nostro cogitavimus augmentare, ut sic in gazophilatium domini ad honorem et gloriam ipsius suorumque sanctorum partem aliquam offeramus, per quam in diuino seruicio pauper fraternitas ipsius Monasterij melius sustentari ualeat in prebenda. Accedente igitur venerabilis Capituli nostri Patauiensis beneplacito et consensu volumus, ordinamus et tenore presentium declaramus, vt medietas prouentuum et reddituum omnium et singulorum sepedicte Ecclesie in Hedershoven tam in dotibus, decimis, fructibus et prouentibus quam aliis obuentionibus, quocunque nomine censeantur, vna cum questu cottidiano cedere debeant eiusdem Ecclesie sacerdoti, qui per antedictum Dominum Abbatem et Conuentum et eorum successores nobis uel nostris successoribvs Patauiensibus Episcopis deinceps canonice presentatur, jura Episcopalia et Hospitalitatem more aliorum pastorum debitam exercebit. Alia uero medietas scilicet prouentuum et reddituum omnium et singulorum antedicte Ecclesie in Hedershoven tam in dotibus, decimis, fructibus et prouentibus quam aliis obuentionibus, quocunque nomine censeantur, excepto cottidiano questu, sicut prenotauimus, Sacerdoti dicte Ecclesie deputato, pro sustentatione et vsu predictorum fratrum Glvnicensi Monasterio ministretur. In cuius rei testimonium presentes damus litteras nostri et prefati Capituli nostri Sigillorum robore conmunitas. Actum et Datum in Ebelsperc anno domini Millesimo Ducentesimo Septuagesimo Quinto, Terciodecimo kalendas aprilis.

Source Fulltext: OÖUB 3 (Wien 1862) S. 424-425, Nr. 464