In Nomine Domini Amen. Nos Vlricus permissione diuina Abbas Monasterij Sancti Archangeli Michaelis in Metten Totusque Conuentus ibidem ordinis Sancti Benedicti Ratisponensis Dioecesis tenore praesentium litterarum profitemur et constare volumus vniuersis praesentibus et futuris, quod Nos vnanimi consilio et consensu cum Ecclesia Glunicensi nostri Ordinis Patauiensis Dioecesis Fraternitatem specialem et Societatem in Domino Jesu Christo contrahere Cupientes ob hoc, vt iuxta Sacra incitamenta doctrinae Beati Petri Principis Apostolorum. qui dicit, Charitate Fraternitatis inuicem diligentes, Fraternitas ita sit nobis specialis occasio et maior ratio intensioris ad inuicem Charitatis nec non ob hoc, ut Secundum quod Salomon Sapientia praecellens innuit, vbi ait: Frater, qui adiuuatur a Fratre, quasi Ciuitas firma, et iterum: Frater in angustijs comprobatur. Ipsa item nunc contrahenda Fraternitas si Glunicensi Monasterio atque nostro legalis vnionis et aequitatis vinculum et indeficiens Deo fauente subsidium in angustijs etiam, si necesse fuerit, spiritualiter et temporaliter comprobandum statuimus et integro deuotionis studio confirmamus, vt Fratres Glunicenses ad Nos causa mansionis cum Praelatorum Suorum litteris venientes tanquam Fratres nobiscum nutriti benignius in omnibus pertractentur, quamdiu nobiscum permissi fuerint commorari, Si etiam quisquam Fratrum illorum causa consolationis ad nos venerit, per vnum mensem vel duos pie sicut vnus de nostris Fratribus teneatur. Statuimus etiam et volumus a nobis et nostris successoribus firmiter obseruari, vt Fratrum omnium praedictorum, quorum nobis obitus innotescet, specialis apud nos memoria peragatur solitis pulsationibus et officijs defunctorum hoc adiecto, si uisum fuerit expedire, quod pro defuncti salute praebenda Fratris vnius triginta diebus pauperibus erogetur. Ad haec autem omnia sic intendimus obligari, vt simile et aequale nobis fiat obsequium Charitatis in Ecclesia Glunicensi. In cuius rei perpetuam memoriam atque robur praesentes litteras nostris sigillis tradimus communitas. Actum et Datum in Metten Anno Dominicae Incarnationis Millesimo Trecentesimo In Crastino Sanctae Gertrudis Virginis.

Source Fulltext: OÖUB 4 (Wien 1867) S. 335-336, Nr. 360