Vniuersis Christi fidelibus praesentes litteras inspecturis Nos miseratione diuina frater Basilius Jerosolimitanus Armenorum, Frater Joannes Turitanus Archiepiscopus, Frater lampertus Aquinensis, Frater Matheus Veglensis, Frater Stephanus Babrogensis, Ildebrandus Aretinus, Frater Romanus Croensis, Adamus Marturacensis, Lando Ouanensis et Andreas Venefrancus Episcopi salutem in Domino sempiternam. Splendor paternae gloriae, qui Sua mundum illuminat ineffabili claritate, pia vota fidelium de clementissima ipsius maiestate sperantium tunc praecipue benigno fauore prosequitur, cum deuota populi mens precibus et meritis iuuatur. Quare cupientes Ecclesiam S. Seuerini in Haidershofen Passauiensis dioecesis a Christi fidelibus iugiter frequentantes (sic) pro temporali labore perpetuae quietis munere gratuletur, omnibus uere poenitentibus et confessis, qui ad dictam Ecclesiam in omnibus festiuitatibus Subscriptis, uidelicet Natiuitatis, resurrectionis, Ascensionis Domini et Pentechostes, Natiuitatis, Purificationis, Annunciationis et Assumptionis Beatae Mariae Virginis gloriosae, in commemoratione omnium sanctorum, in festiuitatibus Apostolorum Petri et Pauli et omnium aliorum Apostolorum, in die Patroni et per octauas ipsarum festiuitatum immediate Sequentes nec non in beatorum Laurentij, Martini, Leonardi et Nicolai beatarumque Margarethae, Catharinae, Mariae Magdalenae, Luciae et Agathae Virginum atque in dedicationis Ecclesiae supradictae festiuitatibus causa deuotionis et orationis accesserint et ibidem Missam audierint uel pro pace Vniuersalis Ecclesiae orauerint mente pia aut pro reparationibus, emendationibus, structuris, luminaribus, fabricae ornamentis, vestimentis, libris, campanis vel alijs quibuscumque dictae Ecelesiae necessarijs manus porrexerint adiutrices uel qui in bona corporis Sui Sanitate Seu etiam in extremis laborantes quicquam facultatum suarum legauerint, miserint, seu mittere procurauerint modo licito Ecclesiae Supradictae, de omnipotentis Dei misericordia et Beatorum Petri et Pauli Apostolorum eius Auctoritate confisi singuli nostrum Singulos dierum quadragenos de iniunctis Sibi poenitentijs misericorditer in Domino relaxamus, dummodo dioecesani loci voluntas ad id accesserit et consensus. In cuius rei testimonium praesentibus nostra Sigilla iussimus apponi. Datum Romae die Vigesimo Mensis Martij, Indictione ... , Pontificatus Domini Bonifacij Papae octaui Anno Quarto.

Source Fulltext: OÖUB 4 (Wien 1867) S. 409-410, Nr. 441