Ich Hainrich der Schilder vnd Hainrich der ponhalm purger ze amsteten vnd wernhart der Rvsewurme ze waithouen veriechen an disem brief vnd tvn chvnt allen den, di in ansechent oder horent lesen, di nu sint oder hernache chvmftiche werdent, daz wir mit vnsern havsvrawen katrein vnd Chvnigvnt vnd Margreten rat vnd auch mit irn gutleichen willen vnd mit aller vnser gerwen gutleichem willen vnd auch mit ir gvnst daz gvt, daz da haisset in der Grvbe, daz da leit in sant valteinz pharre, mit allem dem recht, vnd wir is gehabt haben, gestifftze vnd vngestiftze, gepawenz vnd vngepawens, ze holze vnd ze velde, besvchtze vnd vnbesvchtze dem Apt ze Gloevnch vnd der Samvnge dez selben chlosterz vmb vier vnd zwainich phvnt wienner phenning ze chavffen haben gegeben vnd wellen dez vorgenanten Aptes ze Glaevnch vnd der Samvnge dez selben chlosterz dez vorgenanten gvtes, daz da haisset in der Grvbe, daz da leit in sant valteinz pharre, ob is imme dem Apt ze Glevnch vnd der Sammvnge dez selben chlosterz ze chriege wol tvn, gewere sein als lantze recht ist, vnd ob wir drei Hainrich der Schilder vnd Hainrich der ponhalm vnd wernhart der Rvsewurme nicht werne, da vns got vor behvtte, so schullen vnser gerwen dez ||
vorgenanten Aptes ze Glaeuvnch vnd des Samvnge dez selben chlosterz vmb daz vorgenante gut, daz da haisset in der Grube, daz da leit in sant valteinz pharre, ob imme darvmb habe ze sprechen, dez Aptes ze Glenvnch vnd der Samvnge dez selben chlosterz gewere sein, als lantze recht ist. vnd ist dez chavffez zevche Her Hainrich von Zinzendorf, wernhart von Schafferuelde, Alram von Reigerstorf Richter zu amsteten, wvlfinch von Toesselperge, Rvpprecht sein bruder vnd ander bider leut, di dabei waren, vnd ist der brief darvber gegeben ze einem waren vrchvnde vnd ist der brief verjnsigelt mit wernharze jnsigel von Schafferuelde vnd mit Alramz jnsigel von Reigerstorf Richter ze amsteten durch anderz nicht, danne daz wernhart von Schafferuelde vnd Alram von Reigerstorf Richter ze amsteten dez chavffez zevche sin, vnd ist der brief gegeben, do von Christez geburt waren Drevzechenhundert jar vnd in dem aeineleften iar dez vreitages in den vier tagen in der vasten.

Source Fulltext: OÖUB 5 (Wien 1868) S. 46-47, Nr. 43