Ich Hainrich von volchenstorf hern Ortolfs svn tv°n chv°nt allen den. di disen brif sehent oder horent lesen, daz ich daz lehen datz swetigau pei meim gesvnt meins leibs mit gv°tlichem willen miner chinde zv eini rehten selgeret han geben hintz Glv^enich dem Gots haus dem guten sant Andree vnd den hailigen, die da rastvnt sint, mit sotaner beschaidenhait, daz abpt off, der des selben gotshauss prelat ist, vnd alle die herren, die in sein Capitel gehorent, mir daz gelobt habent, swenne daz sei, daz ich mit dem leib von diser werk schaid, daz man denn sprech dreizzig messe an vnderlaz miner sel vnd allen minen vodern seln und min sel da mit in hv°gnusse haben soll iar, swann min iar tag sei, daz man all iar die dreizig messe an hebe vnd die sprech, als vor genant ist, miner sel vnd miner hausfrowen vnd aller miner vodern sel vnd swer die messe spriht, der schol getrevst werden von dem vorgenannten lehen mit drin schilling pfenning. Vnd tvn auch chvnt, daz ich vor ein widem her geben han, die genant ist an der ode, da mit gewidemt ist der alter des gvten herren sant Seruacen alle Mittichen zv einer messe vnd zv eim ewigen naht licht vnd daz mir an dem vor genanten lehen an der ode sechs vnd vierzig phenninge ab giengen zv der widem zv den messen vnd zv dem licht, daz ich die erstatte han auf dem lehen in der swetigau, daz vor genant ist, do man fv°rpaz nimer dienstes noch stevr auf setzen schol an groz ehaft not des gotshaus vnd antwurt daz vor genant lehen in der Swetigau ins siechaus vnd swer siechmaister ist, der schol daz vor genant lehen inne haben vnd sol do von tvn vnd laisten, daz vor geschriben ist; wer, daz er dar an savmich wer vnd des niht entet, des ich im niht entraw, so schvllen sich mein nachst erwen vnterwinden des vorgenanten gvots mit ir gvtlichem willen vnd an all iervnge iers vogts, swer dann ir vogt ist, so lange, daz daz gepezzert wert, an sweu si savmich gewesen sein, vnd gib dar vber disen brief mit meinem insigel vnd mit den zevgen, die hie geschriben stent: abpt friderich von Chremsmvnster, abpt Vlrich von Gersten vnd probst Ainweig von sant Florian, der Eberhart von walssee Lantrichter ob der Ens, der Hainrich von walse hauptman ze Ens, der chvnrat von Chappel, der hainrich von Lonsdorf, Gvndakker von Losenstain vnd ander piderb Levt. Vnd ist der brief gegeben, do von christes gebvrt waren Drevzehen Hvndert iar vnd in dem ainleftem Jar an Sant Seruacen tag.

Source Fulltext: OÖUB 5 (Wien 1868) S. 52-53, Nr. 50