Wir Engelschalch von gotes genaden Abt vnd di Broderschaft des Gotzhauzz tze Glevnich veriehen offenwar an disem brief, daz wir van dem gv^et in der Swent, daz da haizzet ans (daz) Pretschelichslechen, daz vns geben ist tze einem rechten Selgeraet herren Chunraten van wartenvels, dem got genad, bei sand Johans alter ze Glevnich ewichleich ein nacht liecht haben svllen vnd alle wachen ein Messe mit opfer dreier pfenning seiner sel tze hilf vnd tze trost, dar tzv wir vns verbinden bei vnsrer gewizzen vnd mit dem vrchunde ditz gegenwurtiges briefs also beschaidenleich, wenne man vns ains min tzwaintzich pfunt pfenning gemainer wienner mvntz geit, so sol daz var benante gv^et ledich sein vnd svll wir div Messe vnd daz nachtliecht da van ewichleich haben vnd berichten. Vnd daz div wandlung hin fvr staet beleib vnd vntzerbrochen, darvber geb wir disen offen brief versigelten mit vnsern baiden Insigeln. Der brief ist gegeben, da van Christes gebu^erd warn ergangen drevtzechen hundert iar, darnach in dem sechs vnd tzwaintzigistem iar an sand Georgen tag.

Source Fulltext: OÖUB 5 (Wien 1868) S. 448-449, Nr. 449