Multae religionis viris Domino Engelschalco Dei gratia venerabili Abbati totique Conuentui Ecclesie Glunicensis amicis nostris in Christo specialissimis Frater Eberhardus dictus Abbas et Conuentus Monasterij in Paungartenperg cum deuotis orationibus multum reuerentie, plus amoris. delectabiliter intonuit in nostre nostrique Conuentus mentis Secretarium lecta et plenius intellecta vestrarum, quas nobis misistis, dulcissima Series litterarum, quarum quidem irriguum eo verosimilius ex votiue fidei puteo scaturire perpendimus, quo fluentius quoque placidius in illis ad antique familiaritatis et mutui amoris renouationem, que iam ex Ecclesiarum nostrarum Fratrumque rara alterutrorum uisitatione quodamodo refriguerat, inuitamur. Sane pristinam dilectionem etati, que nunc est, efficacius imprimere uolentes exigente pie deuotionis affectu, quem ad nos accepimus habere, petitioni uestre benigno occurrentes assensu concedimus uobis singulis et singulariter omnibus plenariam participationem bonorum omnium, que fiunt et de cetero domino dante in domo nostra fient, in uita uestra pariter et in morte ita, quod, cum obitus vniuscuiusque uestrum nostro fuerit Capitulo nunciatus, sicut vnus nostrum in eodem Capitulo absoluetur omniumque Missarum et orationum, quas annis singulis pro fratribus nostris faciendas iniungimus, participes uos et consortes constituimus harum testimonio litterarum. Datum in Paumgartenperg Anno Dominj millesimo trecentesimo uigesimo septimo in die Purificationis Beate Marie.

Source Fulltext: OÖUB 5 (Wien 1868) S. 466, Nr. 469