ICH Marchart der Celler, ich Alhait sein hausfrowe wier veriehen offenbar an disem prief, daz wier dez chriegs vnd der ansprach, dev wier gehabt haben hintz dem Gotzhaus tze Glevnch vmb tzwai gert gelegen auf dem Dürstling in Nevnchircher pfarr pei der Ypf, div weiln her Fridreich der Chersperger van dem Stain, dem Got gnad, dem selben tzv einem rechten selgret gegeben het, hinder erber laut vnd vnser frevnt gegangen sein, die vns davon genomen habent also, daz wier nach rat vnd mit wolbedachten můt vnd mit gu^etlichem willen vnser selber vnd aller vnser erben von aller ansprach gegen dem selben gůten gestanden sein vnd daz wier vns gaentzleich vnd redleich vertzigen haben vnd auch vertzeichen der vorgenanten zwaier gut auf dem Du^erstling mit alle div, vnd dartzv geho^ert, versu^echt vnd vnuersu^echt so, daz noch wier noch dhainer vnser erben oder vnser afterchunft hinfu^er ieman chainz recht oder chain ansprach dargegen immer haben su^ellen oder mu^egen. mit v^erchund ditz gegenbu^ertigen offen priefs, der versigelt ist mit meinem vorgenanten Marchartz dez Celler aigen anhangundem jnsigel vnd mit hern Marcharts dez Chersperger jnsigel van dem Stain vnd mit Ortolfs dez Chersperger jnsigel seins pru^eder vnd mit Hertleins dez Chersperger iers vettern tzv^e einer gancen warhait vnd ewigen staetichait derselben sache. der Prief ist gegeben, da von Christes gepu^erd warn dergangen drivtzehenhundert jar, darnach in dem siben vnd viertzigistem iar an sant Michels tag.

Source Fulltext: OÖUB 7 (Wien 1876) S. 32, Nr. 34