Ich Berchtold von Losenstain vergich offenbar an disem brif vnd tuen chunt allen den, div in sehent lesent oder lesen horent, div nv lebent oder her nach chunftich werdent, daz ich mit wolbedachtem muet vnd mit aller meiner erben guetleichem willen vnd czu der czeit, do ich iz wol getuen macht, meines rechten chauf aygens ain guet genant im Hag, gelegen in Haedershouer pharr ob der strazz, daz an vnser frowen tag czu der dienst czeit dient ein halbez phunt neuer wienner phenning vnd czwai heribst huenr vnd czwai vachsanch huenr vnd fier chaes, acht phenning werd, vnd dreizzich ayr vnd steur, ledichleich gegeben han mit alle div vnd dar czue gehort cze holcz, cze veld, besu^echt vnd vnbesu^echt, oder wie iz benant sei mit solcher beschaidenhait, daz siv jaerleich dez nagsten mantags vor dem aufert tag ain vigili vnd dez nagsten erichtag margens dar nach ain sel mess singen sullen mir vnd meiner hausvrowen froun Margreten vnd allen vnsern erben cze hilf vnd cze trost. Dar czue sullen siu auch jaerleich an sand Jacobs tag in dem snit ein vigili vnd dez nagsten tags nach ein sel mess singen vnd vleizzich bitten vmb hern Gundakers sel vom Losenstain vnd vmb seiner hausvrowen sel froun Annen vnd vmb ir baider erben vnuerczogenleich. Vnd dacz siv czden baiden vorgenanten taegen dez selben gotstdienst dester fleizzig sein, sol man den herren in conuent jaerleich raichen vnd geben czu einem isleichen jartag sechkich (sic) phenning vom dem selbem guet, vnd dez mantags var dem auffert tag sol man auch den herren in conuent raichen ein halben emmer weines, dez der abbt selber trincht, an alle wider red. Vnd sullen auch div vorgeschriben mess vnd div vigili beseczen mit geleut vnd mit liecht, als gewanhait ist, vom dem selben guet. Vnd wo dez nicht geschaech, oder daz siv dar an saumig waeren, daz sol ich oder mein erben haben auf dez gotshaus guet, vncz iz wider tan werd mit irm guetleichen willen. Vnd daz in daz hin fur staet beleib vnd vnverchert, dar vber gib ich vorgenanter Berchtold vom Losenstain disen gegenburtigen offen brif versigelten mit meinem aygen anhanunden (sic) jnsigel vnd bestaetteten mit meins vettren jnsigel Dietmars vom. Losenstain, czu einer ganczen vnd richtigen staettichait der selben sach. Der geben ist, do von Christi geburd waren ergangen dreuczehenhundert jar, darnach in dem funfczigisten iar an sand Gorgen tag.

Source Fulltext: OÖUB 7 (Wien 1876) S. 181f., Nr. 180