Ich Heinreich von Volchenstorff vergich offenwar mit disem brif vnd tůn chunt allen den, di in sehent, lesent oder lesen ho^ernt, daz ich mit wolbedachtem můt vnd mit aller meiner erben gutleichem willen vnd ze der zeit, do ich ez wol getu^en mocht, den erbern herren vnd den gaeistleichen lauten abbt Hainreichen vnd der sammung ze Glevnikch meines vreyen aigens ein gu^et ledichleichen vnd vreyleichen gegeben han, daz da haizzet datz dem Rötlen auf dem aigen gelegen in sand Mareinchiricher pharr mit alle dew, vnd dar zu geho^ert ze holtz vnd ze veld, versuecht oder vnversuecht oder swie ez benant sey, vnd daz dient iaerleichen zehen vnd sechs schilling alter phenning an vnser Vrowen tag zder dienst zeit, vnd han auch den selben herren funfk phenning gelts geschaft iaerleichen in zu geben an dem vorgenanten vnser Vrown tag auf meinem aigen gut ainem, daz da haizzet auf der Stainwant gelegen in Stadelchiricher pfarr also, wenn ich oder mein erben in richtig machen oder chauffen oder in geben fumfk phenning gelts, da si in wol gelegen sint oder daz ich oder mein erben in geben sechs phunt braiter phenning wienner mu^enzz, so schol daz vor genant gu^et auf der Steinwant ledich sein vnd schol den vorgenanten herren zu Glevnich von dem vorbeschriben phunt gelts jaerleichen an dem naechsten vreytag vor Phingsten gevallen vnd gewert wern (sic) von dem sichmaister in dem chloster, der daz selbig guet innehaben schol, fumf schilling phenning vmb ein sel messe, di si desselben vreytages singen schullen vnd vmb ein vigili, di si des vo^edern phintztag abents haben schullen, vnd darnach zu hant schullen si vmb di andern drey schilling sprechen dreizkk messe an vnderloz mir vnd meinen zwain hausvrowen, den Got genad, Elspeten von Goldekk vnd Sopheinn von Chranichperg, vnd aller meiner vodern sel zu hilf vnd zu tro^est. Geschaech des nicht oder daz sev an derselben messe oder vigili savmich waern, des Got nicht en geb, so schol sich der naechst vnd der pest mein erb desselben gutes an nu^eczz vnderziehen vnd schol daz inne haben als lang, vncz daz allez daz wider tan werd, daz sev vor versaumt haben an vnserm vorgeschaftem selgraet. Vnd daz dicz mein geschaeft vnd mein vreyew gab hinfu^er staet vnd vnuerchert beleib, darvber gib ich vor genanter Hainreich von Volchenstorf disen gegenwürtigen offen prief versigelt mit meinem aigen anhangundem insigel vnd mit Go^ergen meins svns aigen insigel bestaet zu ainer richtigen vnd 'gantzen staetichait der selben sach. Der selbig prief ist gegeben, do von Christes gepurt waren ergangen dreutzehen hundert jar, darnach in dem ain vnd fu^enfkistem jar an sand Stephans tag ze weinachten.

Source Fulltext: OÖUB 7 (Wien 1876) S. 212f., Nr. 212