ICH Hainreich von Volchenstorff vergich offenwar mit disem brief vnd tu^en chunt allen den, di in sehent lesent oder lesen ho^ernt, daz ich mit wolbedachtem mu^et vnd mit aller meiner erben gu^etleichem willen vnd ze der zeit, do ich ez wo! getu^en mocht, den erbern herren vnd den geistleicben laeuten abbt Hainrich vnd der sammung ze Glv^enikch meines vreyen aigens ein gu^et ledichleichen vnd vreyleichen gegeben han, daz da haizzet datz dem Ro^etlein auf dem aigen, gelegen in sand Mareinchiricher pfarr mit alle dev, vnd darzu^e geho^ert ze holtz vnd ze veld, versuecht oder vnversuecht oder swie ez benant sey, vnd daz dient iaerleichen zehen vnd sechs schilling alter phenning an vnser Vrowen tag zder dienstzeit; vnd han auch den selben herren funfk phenning gelts geschaft iaerleichen in zu geben an dem vorgenanten vnser Vroven tag auf meinem aigen gu^et ainem, daz da haizzet auf der Stainwant, gelegen in Stadelchiricher pfarr also, wenn ich oder mein erben in richtig machen oder chauffen oder in geben fumfk phenning gelts, da si in wol gelegen sint, oder daz ich oder mein erben in geben sechs phunt braiter phenning wienner mu^enizz, so schol daz vorgenant gu^et auf der Stainwant ledich sein vnd schol den vorgenanten herren zu Glv^enich von dem vorbeschriben phunt gelts jaerleichen an dem naechsten vreytag vor phingsten gevallen vnd gewert wern von dem siechmaister in dem chloster, der daz selbig guet inne haben schol, fumf schilling phenning vmb ein selmesse, di si desselben vreytages singen schu^ellen, vnd vmb ein vigili, di si des vodern phintztag abents haben schullen, vnd darnach zu hant schullen si vmb di andern drey schilling sprechen dreizkk messen an vnderlo^ez mier ynd meinen zwain hausvrowen, den Got genad, Elspeten von Goldekk vnd Sopheinn von Chranichperch vnd aller meiner vodern sel zu hilf vnd zu tro^est. Geschaech des nicht oder daz sev an der selben messe oder vigili savmich waern, des Got nicht engeb, so schol sich der naechst vnd der pest mein erb des selben gutes an nutzz vnderziehen vnd schol daz inne haben als lang, vntz daz allez daz wider tan werd, daz sev vor versaumt haben an vnserm vorgeschaftem selgraet. Vnd daz ditz mein geschaeft vnd mein vreyew gab hinfu^er staet vnd vnverchert beleib, darvber gib ich vorgenanter Hainreich von Volchenstorf disen gegenwu^ertigen offen prief versigelt mit meinem aigen anhangundem jnsigel vnd mit Go^ergen meins svns aigen jnsigel bestaet zu einer richtigen vnd gantzen staetichait der selben sach. Der selbig prief ist geben, do von Christes gepu^ert waren ergangen dreutzehen hundert jar, darnach in dem ain vnd fünfkisten jar an sand Stephans tag ze weinachten.

Source Fulltext: OÖUB 7 (Wien 1876) S. 273f., Nr. 267