Ich Ortolf von Chersperch, jch Chunrad von Sinczenperg, dez vorgenanten Ortolfs von Chersperch aidem wir veriehen offenbar an disem brief vnd tun chund allen den, di in sehent lesent oder lesen hornt, daz wir mit wol bedachtem muet vnd nach vnsrer freunt rat vnd mit guetlehem willen dem gotshaus tze Glunich vnd den herrn da selben vnsers rechten lehens ein guet an dem Ekke, gelegen in Wolfarer pharre mit alle diw, vnd dar czu gehort cze holcz cze veld, besuecht vnd vnbesuecht oder wi ez benant sei, daz wir von den erwirdigen herrn von Volchenstarf hern Georgen vnd hern Ortolfn, weiln herrn Hainreichs svnn von Volchenstarf, dem Got gnad, cze rechtem lehen gehabt haben, ledichleich gegeben haben nach der volg vnd nach den rechten, di daz vorgenant gotshaus cze Gleunich von allen Volchenstarffern hat, vns vnd vnsern vadern vnd sunderleich hern Marcharten von Chersperg meins vorgenanten Ortolfs von Chersperch bruder cze einem rechten selgerech (sic). Dar czu haben auch wir dem vorgeschriben gotshaus mit gueter betrachtung vnd mit ganczen willen aller vnser erben vnd czu der czeit, do wir iz wol getuen machten, vnsers rechten vnd frein aigens ein wis, di da haizzet di Purch wis, gelegen bei dem selben guet am Ekke auch in Wolfarer pharre gegeben czu einer pesserung dez selben selgerecz also, daz wir derselben wis dez oftgenanten gotshaus gewern vnd scherm sullen sein an aller stat fur alle ansprach. Vnd waz si dez schaden nemen, den sullen si haben auf alle di, vnd wir haben in dem land cze Osterreich, vnd dar vmb sullen di herrn vnd der conuent dez selben gotshaus cze Glunich dez vorgeschriben hern Marcharcz von Chersperch jartag jerleich begen an sand Margreten tag mit einer vigili vnd dez andern margens mit einer gemain gesungen messe an alle furczicht. Dar czu sullen auch di selben herrn den vorgenanten hern Marcharten den Chersperger treuleich vnd genczleich nemen in ir bruderschaft vnd in ir guettet, da si Got mit dienent, iz sei bei nacht oder bei tag. Vnd daz das hinfur alles stet beleib vnd vnuerchert, darvber geben wir disen gegenwu^ertigen offen brief versigelten mit meinem dez vorgenanten Ortolfs dez Chersperger jnsigel vnd mit meinem egaenanten Chunrates dez Sinczenperger jnsigel vnd mit Wilhalms dez Chersperger dez vorgenanten Ortolfs dez Chersperger bruder anhangunden jnsigel cze einem rechten geczeug vnd czu einer ganczen sicherhait der selben sache. Vnd der brief ist geben, da von Christi gepurd waren ergangen dreuczehen hundert jar dar nach in dem drew vnd fumfczigisten jar an sand Gregory tag in der vasten.

Source Fulltext: OÖUB 7 (Wien 1876) S. 300f., Nr. 296