Wir Heinreich von Gots gnaden apt vnd di gemain der bruderschaft cze Glunich veriehen offenbar an disem brief, daz wir mit gemainem rat vnd mit guetleichem willen enphangen vnd ingenumen haben von Fridreichen dem Chresling weilen hern Fridreichs svn dez Chresling von dem Dorf, den Got gnad, daz selgeret, daz der vorgenant her Fridreich der Chresling von dem Dorf mit dem egeschriben Fridreichen dem Chresling seinem svn vnd mit allen seinen altisten erben geschaft het ain pfunt geltes gemainer wienner munzze auf czwain gueten, di sein rechtes aygen gewesen sind, im Pach ains ob Herdershoff Dorf gelegen vnd ains auf dem Smidesperg, baide gelegen in Herdershoffer pharre, daz sein erben vnd er inne gehabt habent seind dez vorgeschriben hern Fridreichs des Chresling von dem Dorf tod seins vater, vnd davon getailt habent armen leuten an sand Geori tag als vil, vnd daz pfunt pfenning geltes getragen macht jerleich, hat gegeben vnd ingeantwůrt er vnd all sein vadern mit guetleihem willen aller seiner erben vnd czu der czeit, da si ez wol getu^en machten, mit allen den rechten vnd nu^eczen vnd in aygens gewaer, als si di vorgenanten guet herpracht vnd innegehabt habent, den heyligen vnd der chirchen cze Hedershoffen in alle diw recht, als ander leut der vorgenanten chirchen cze Hedershoffen, cze einem rechten selgeret seinem vater vnd im vnd allen seinen erben vnd vorvadern vnd nachchvnftigen seln cze hilf vnd cze trost mit solher beschaidenhait, daz ein igleiher pharrer cze Hedershoffen jerleich vnd ewigleich begen sol irn jartag an sand Alexi tag czu der andern vesper mit einer gesungen vigili vnd dez nachsten tags darnach mit fumf sel messen vnd nach dem gotsdienst trewn vnd speisen sol fumfczehen armew leut vnd den geben drew essen, da si mit beleiben mugen, vnd vier chenel weins vnd nach dem essen aynem igleihen menschen ain phenning. Waer awer daz, das der vor genant pharrer cze Herdershoffen dazselben (sic) gotsdienst vnd selgeret nicht volpringen möcht als vor geschriben stet, von ehaften nöten, so sol er an vnderlaz den gotsdinst vnd daz selgeret volpringen in denselben acht tagen nacheinander cze raiten; geschech dez nicht, daz der gotsdinst vnd daz selgeret nicht volpracht wurd in den acht tagen, so ist ein igleiher pharrer cze Herdershoffen veruallen cze einer pessrung, daz er mern sol den goczdinst mit drin messen czu den fvmfen vnd mit acht armen leuten czu den fvmfczehen also, daz er in denselben acht tagen diw saumung an dem goczdinst vnd auch di pessrung, da er mit geuallen ist, czueinander cze raiten mit acht messen vnd mit drin vnd czwainczig armen leuten vollichleich wider tu^en vnd vnuerczogenlich. Geschech dez alles nicht, so sullen sich di nachsten erben vnderwinden der vorgeschriben guet an der armen leut schaden, di auf den gueten gesessen sind vnd innehaben vierczehen tag, ob der goczdinst vnd daz selgeret vnd auch die pessrung wider tan wurt vollichleich, so sullen si wider ledig sein den heyligen vnd der chirchen cze Hedershoffen. Waer awer daz, daz sich daz allez nicht vergieng, als vor geschriben stet, so sullen wir vns der abt vnd der conuent cze Glunich der vorgenanten guet in dem Pach vnd auf dem Smidesperg vndercziehen mit allen den rechten, vnd vorgeschriben stet, vnd den jartag mit der vigili vnd fumf messen vnd mit den fumfczehen armen leuten jerleich begen an sand Allexi tag allen den seln, als vor geschriben. Vnd daz daz stet vnd vnczebrochen beleib, darv^eber geben wir dem oftgenanten Fridreichen dem Chresling vnd seinen erben disen gegenwůrtigen brief versigelten mit vnsern paiden anhangunden jnsigeln zu ainer pessern sicherhait vnd warheit dez oftgenanten gotsdinst vnd selgeret vnd czu einem rechten vrchund vnd warheit der selben sache, vnd der brief ist gegeben, da von Christi gepurd warn ergangen dreuczehen hundert jar, darnach in dem drev vnd fumfczigisten jar an sand Allexi tag.

Source Fulltext: OÖUB 7 (Wien 1876) S. 317f., Nr. 311