Ich Tu^erinch der Sazzer vnd Reicher mein bru^eder vnd alle ander vnsrew geswistreyd vnd auch alle vnser erben vergehen vnd tu^en chund allen den, di den prief sehent oder horent lesen, daz wir mit wolbedachtem mu^et vnd mit gu^etleichem willen aller erben vnd auch nach rat vnser pesten freunt zue der zeit, da wir ez wol getu^en machten, gegeben haben vnsers gu^etz ain freyes aygen, daz gelegen ist ze Stenning in dem do^erff in der Stadelchircher pfarr, da Preyd Nukhlin auf gesesen ist vnd daz drey schilling phenning wienner münzz gilt, zu einem ewigen selgeraet allen vnsern vadern ze hilf vnd ze tro^est dem pfarrer ze Tuedich zu der chappellen daz Stadel, daz wir noch vnser erben jmmermer chain ansprach oder recht dar zu^e haben sullen, doch also mit der beschaiden, daz die ob genant Nuklin vnd all ier erben daz selb gu^et schullen haben zv einem rechten erben, daz in daz nicht geho^echert sol werden, vnd schullen auch nimmer geben, dann van der abvart ain huen vnd von der aufvart auch ain huen ze erung si oder wem si irew recht gebent, vnd dar an schol si auch niemant ierren. Ez sol auch der vor genant pfarrer ze Tuedich, der die chappellen besingt dacz Stadel, alle iar begen Ludweichs dez Sazzer jartag drei tag vor sant Thomas tag vnsern vetern vnd Reichers dez Sazzer jartag vnsers vater an dem dritten tag nach sand Ayten tag, igleichen mit zwain messen vnd mit gemainen pet, vnd wan der pfarrer dar an saming waer vnd dez niht taet, als oft ist er dem siechmaister ze Glu^enich in daz siechaus veruallen zwen vnd dreyzzig wienner phenning vnd der chappellen ze Stadel ain phunt wags. Daz daz also staet vnd vnczebrochen behalten werd, geb wir darveber zu einer guter geczewchnusse fur vns vnd vnser erben, wann wir selben aigener jnsigeln nicht enhaben, gegenwürtigen offen prief versigeltes mit vnserr nachsten frivnt jnsigel Hainreichs, Otten des Stadeler, Wernhartz des Steger vnd Haertneytz dez Hawzenpechen, vnd geschen do man zalt van Christi gepu^erd drevczehen hundert jar, dar nach in dem vier vnd fumfczigisten jar an dem heligem liechtmesse tag.

Source Fulltext: OÖUB 7 (Wien 1876) S. 347f., Nr. 339