Ich Peter van Riczenwinchel Otten seligs pruder van Ritzenwinchel dem Got gnad, vnd jch Ott der Hinderholczer wier veriehen paid vnd tu^enen chund allen den die den prief sehent lesent oder lesen ho^ernt, daz wier aufgenumen haben van Otten seligen van Riczenwinchel vnd seiner hawsvrown frown Elspeten vnd van allen seinen erben su^en vnd tochtern ze der zeit du si ez wol getu^en machten vnd an seinen lesten zeiten mit aller stat ires frein aygens ain guet an der Hueb genant bei Blumenawe in Chirchtarffer pfarre gelegen ledichleich gegeben vnd gevertigt hat (sic) mit aller staet nach landes recht ze Osterreich vnd mit allen rechten vnd nůczen alz er iz var inne gehapt hat, dem gotshaws vnd dem conuent dacz Glunich auf di gustray daselbs iem vnd hern Heinreichen dem Alhartinger seligs dem Got gnad, ze einem rechten selgeraet also beschaydenlich, daz man jaerleich davan dienen vnd raichen sol wer daz gu^et besiczt, dem guster ze Glunich an sand Stephans tag ze ostern fumf schilling phenning wiener mu^enzz, vnd van den selben phenning sol der guster raichen dem conuent ain halbs phunt phenning, davan dem vargenanten Otten dem Riczenwinchler ze begen ainen jartag mit vigili vnd mit selmesse an dem achten tag nach sand Stephans tag ze ostern, vnd fu^emf schilling wienner phenning ze vnser frown tag ze der dienst zeit, van den der guster dem conuent auch raichen sol ain halbs phunt pfenning darvmb ze begen hern Heinreichen dem Alhartinger einen jartag dez naecsten tags nach sand Pauls tag ze weinachten mit ainer vigili vnd mit ainer selmisse. Waer awer daz der dez geltz nicht enraichet der daz vorgenant gu^et besiczt ze einem isleihen obgenanten tag dem vargenantem gu^ester, so ist er veruallen nach vierczehen tagen sechczig pfenning ze wandel. Vnd geschaech auch di saumung, daz das varbenant gelt ze einem isleihen obgenanten tag den conuent nicht geraicht wiert vnd die jaerteg nicht begangen wu^erden als var geschriben stet, so sullen sich di naechsten vnder seinen erben dez gu^etes vnderwinden an schaden vnd daz inne haben alz lang, vnezt daz di saumung wider getan wirt di an dem vargeschriben selgeret gewesen ist. Darnach mit aller vadrung sol daz selb gu^et oder wer ez besiczt wartund sein dem gotshaws vnd dem apt dacz Glunich mit stiften mit sto^ern mit vogtrecht, alz ander dez gotshaus v^erbar leut recht habent. Vnd daz di red also staet belib vnd vnuerchert, darvber gib ich vargenanter Peter der Riczenwinchler vnd ich Ott der Hinderholczer sein o^ehaim fu^er in vnd fu^er all sein erben den gegenwurtigen offen prief versigeltes mit vnsern paiden anhangunden jnsigeln, der gegeben ist da van Christi gepu^erd warn ergangen drevczehen hundert jar darnach in dem siben vnd fumfczigisten jar an dez heiligen herrn sand jorgen tag.

Source Fulltext: OÖUB 7 (Wien 1876) S. 499f., Nr. 492