Ich Reicher vnd Hertneid Chu^enrat Heinreich vnd Ott di Stadler vergehen offenbar an dem prief vnd tu^en chund allen den di in sehent lesent oder lesen ho^ernt, daz wir mit veraintem rat aller erben vnsers aygen gu^etes gegeben haben ein hueb gelegen in Chranstarffer pharre vnd genant dacz dem Waemplein in der Reutt, da man van dient jerleich an vnser frown tag ze dinst ein halb pfunt pfenning vnd an sand Maerteins tag auch ein halb pfunt pfenning wienner mu^enzz di dez iars sint, vnd ein vogt huen, di wir geben durch Got mit ganczer aygenschaft dem pharrer ze Tuedich zu der chappeln ze Stadel also beschaidenleich, daz der selb pharrer jaerleich an sand Merteins tag in den sechs wochen sol begen ein jartag mit ainer vigili vnd mit vier selmessen allen vnsern vadern ze hilf vnd ze trost, vnd darnach sol er sprechen dreyzig messe mit ganczer gedechnuss vnsern vattern Heinreichen vnd Otten den Stadlern den Got genad. Waer awer daz der vorgenant pfarrer daran sawmig waer vnd nicht begieng alz er van recht solt daz ein gewissen waer, so schol in der siechmaister ze Glvnich darzu no^etten vnd sol im geben sechczich pfenning wienner mu^enzz ze wandel vnd der chirchen ze Stadel zway pfunt wachs alz oft daz geschieht. Darnach sol auch der vargenant pfarrer auf der vargenanten hueb lassen den leuten ier erbrecht alz in var bestetet ist, dann alz vil ob sich daz gut verwandelt mit dem chauff oder mit dem tod, so sol der da auz vert geben dreizig pfenning, vnd der da in vert auch dreizig pfenning wienner mu^enzz alz oft daz geschicht, vnd ob der hold mit recht wandels schuldig wirt daz ist auch dez pfarrer, vnd sullen wir egenant Stadler dehainerlay suechung noch recht fuerbaz zu dem vargenanten gut vnd den leuten nicht enhaben nur daz wir siw fudern sullen an aller stat. mit vrchunt dicz gegenwůrtigen offen priefs versigeltes mit vnsern vargenanten Stadlern Reichers vnd Hertneyts Chunrates Heinreichs vnd Otteins anhangunden insigeln, der gegeben ist da von Christes gepu^erd warn ergangen drewczehen hundert iar darnach in dem siben vnd fumfezigisten iar an dem heyligen sunbentag.

Source Fulltext: OÖUB 7 (Wien 1876) S. 511f., Nr. 503