ICH Leubel der Veterl ze Chrems und ich Elswet sein hawsvrow und unser erben wier vergechen, daz wier unverschaydenlich gelten sullen Petrein dem Flotzer purger ze Chrems di zeit hofmayster in Gelaewnkchaer hof daselbs und seiner hawswrow wrown Elsweten und iern erben sechtzechen phunt winer phening, oder wem sev daz gelt mit dem brief schaffent oder gebent, und zu ainer pezzern sicherhayt so hab wier in dafu^er ze phant gesatzt ledichleich und unverchumbert unsern weingarten des ain halbs jewch ist und gelegen ist ze Chrems ze no^egst der Chamer und hayst daz Pru^echel, mit allen nu^etzen mit percherren hant hern Perchtoltz von Griezz di zeit hofmayster in Admu^ender hof ze Chrems, davon man jaerlichen ze purchrecht geit in denselben hof dritthalben phening an sand Michels tag also weschaydenlich, alle di weil und wier in der vorgenanten sechtzechen phunt phening nicht engeben, so sulle wier in jaerlichen davon raichen und dienen zway phunt phening geltz winer mu^enzz an sand Mertein tag, taet wier des nicht, so vervelt sich wandel darauf alz purchrechtz recht in dem lant ze Osterreich ist und der payder stet ze Chrems und ze Stayn. waer aver daz wier in den dienst und di wandel verzugen an ieren willen und nicht engaeben, so sullen sev uns no^etten und phenten mit dem vorgenanten weingarten und nutzen an fu^erbot und an chlag und an alles recht mit des gerichtz poten alz lang, untz daz sev wandels und dienstes gantz und gar verricht und gewert werdent. wier sein auch der vorgenanten phening der zwayer phunt geltz auf den egenanten weingarten ier recht gewern und schermb fu^er alle ansprach, und was in daran abget daz sullen si haben auf mier O^etten dem Sneyder von Minnpach datz meiner hawswrow und auf allen unsern erben und auf aller hab di wier haben in dem lant ze O^esterreich. wier offen auch daz uns der egenant Peter sein hawswrow und ier erben di weschaydenhait habent getan, swelichs jares wier in geben var sand Merten tag viertzechen tag oder viertzechen tag hinnach sechtzechen phunt winer phening und den vorgenanten dienst darauf an ainem tag mit ein ander, so sey wier und unsers vorgenantes phant ledig als var, also hab wier vreyew wal abzelo^esen und nicht anders. Und daz daz fu^erbaz staet und unzebrochen beleibe und wan wier ich egenanter Lewbel und ich egenanter O^ett der Sneyder di zeit aygener insigil nicht gehabt haben, so hab wier gepeten di erbern laewt hern Perichtolten und Herman an der Wegschayd purger ze Chrems daz si irew insigil an den brief gehangen habent zu^e einem waren zeug dier sach ien an schaden. Der brief ist geben nach Christi gepurd drewtzechechen hundert jar darnach in dem sechs und sechtzigistem jar des samptags nach sand Elsweten tag.

Source Fulltext: OÖUB 8 (Wien 1883) S. 298ff., Nr. 304